Shillong, Risaw 07
U Bah VGK Kynta uba dei u kyrtong MP Lok Sabha na ka UDP u la ong ba u Lamphang u la dei ban mait beit ïa ka jinglong MLA ïa u Bah Lahkmen Rymbui namar u la rung sha ka BJP tangba u dang bat sah kum u Myntri ha ka Sorkar MDA-2.
U Bah Kynta u la ong haba la rung sha kawei ka seng u la dei ban hiar shuki noh kum u Myntri namar um dei shuh na ka UDP.
“Kumno u Bah Lah-kmen u bat sah kum u Myntri namar ka jinglong Myntri jong u ka dei na ka bhah jong ka UDP, lada long kumne ka mut kawei ka kjat ha ka UDP bad kawei ha ka kjat jong ka BJP, kumta u Lamphang u dei ban mait kyrteng beit ïa ka jinglong MLA khlem jingartatien” u la ong.
U Bah Kynta u la ong ba shisien ba u la mih na ka UDP u la dei ban rah lang ïa ki tiar ki tar ryngkat ki jaiñ namar lada um hiar shuki kum u Myntri ka pyni ba u buaid bor.
Kumta u la kyntu ïa u Myntri Rangbah ka Jylla u Conrad K Sangma ba u dei ban pyni ruh ïa ka jingkhlaiñ bor ban pynhap shuki beit ïa kum kine ki MLA.
“Nga kren kum u riew shimet halor kane ka bynta namar nga la ijli ïa kane ka jingleh khnang ba ki paidbah kin sngewthuh, la ong u Bah VGK Kynta haba pynkut ïa ka kyrwoh khubor.
Kum ban shu kdew u Bah VGK Kynta u dei u nongïasaid aiñ ka Jylla uba la kham slem uba ka UDP ka la pynbna ba un long kum u kyrtong ha kane ka ilekshon MP Lok Sabha shiteng samoi hynrei u la shah iehnoh shadien haba kine ki phra ngut ki MLA ki la mih noh ban leit pynïasoh sha ka BJP.
Haduh mynta ki MLA ka UDP kiba dang sah ki long satang saw ngut kata u Bah Metbah Lyngdoh, Bah Paul Lyngdoh, Bah Renikton Lyngdoh bad Bah Nujorki Sungoh.
