Shillong, Risaw 07
Ka jingïakhih jong ki muktiar pyrshah ïa u Advocate General Amit Kumar mynta ka la kylla long ka jingïakhun sa kumno ban pyntip ïa ka jingpynlut pisa ka Sorkar, ha kaba ka High Court Bar Association ka la kynnoh ba ka Sorkar Jylla ka thmu ban buhrieh ïa ki jingtip ba bniah halor ka pisa paidbah ba la pynlut ha ka ophis jong u AG.
U Secretary General u Kishore Gautam u la ïathuh ba ïa ka jingpan da ka Right To Information kaba pan ïa ki jingtip ba bniah halor ka jingpynlut pynsep haba ïadei bad ka ophis u AG, la kyntait ha ka sngi kaba laiphew da kaba kdew ïa ka Section 8.
“Ngi la pan RTI ban tip haduh katno ka pisa paidbah la pynlut na ka bynta ka ophis jong u Advocate General bad ki nongïasaid aiñ ba shabar. Ha ka sngi kaba laiphew, ki la jubab da kaba ong ba kim lah ban ai ïa ki jingtip katkum ka Section 8, kaba long satia kaba ym lah ban pynskhem katkum ka aiñ,” la ong u Gautam.
“Kane ka jingbym lah ban ai jingtip ka paw shai ba ka Sorkar ka pyrshang ban buhrieh ïa ki jingtip namar kam kwah ba ka pisa ba la pynlut ha u AG bad ka ophis jong u kan mih paidbah, namar nangta ki briew kin sa sngewthuh balei ngi ïakhih,” u la ong.
U Gautam u la ong ba ka jingkheiñ ka poi da ki klur, kaba kham heh shibun ban ïa kaba hapoh ki AG ba mynshuwa.
“Ka pisa ka la poi da ki klur, la pynlut na ka bynta ban pynïaid ïa ka ophis jong uwei u Advocate General uba wan na Delhi haba ïanujor bad ki Advocate General kiba kham mynshwa” u la ong.
“Na ka bynta ka Jylla kaba rit kum ka jong ngi, ngim donkam ban pynlut haduh katne na ka bynta ki AG bad ki nongïasaid aiñ ba shabar kiba wan na shabar bad sah ha ki “five star Hotel,” bynrap biang u Gautam.
“Ia kata ka jingtip la kyntait ïa ngi. Ngi la mudui ïa ka jingujor kaba nga pyrkhat ba yn kyntait ruh, hynrei ngin ïai bteng. Kim lah ban khot ïa ka Section 8 haba donkti ha ka pisa paidbah,” u la ong.
U Gautam u la ong, ba u Amit um dei u nongïasaid aiñ ba rangbah ha ka por ba u wan sha ka Jylla hynrei la thung ïa u na kane ka jaka, kumta ki la khot ïa ka jingïalang jong ka kynhun ha kata ka por bad ki la kwah ban tuklar ïa ka jingshah thung jong u, hynrei ym shym la lah.
