Guwahati Nailar 21
U Myntri Rangbah ka Assam, u Himanta Biswa Sarma, u la ai ksai ba ki samla pule kiba pyndep ïa ka kyrdan pule ‘graduate’ na ka skulbah shimet ka University of Science and Technology, Meghalaya (USTM) kaba don ha khappud ka Meghalaya bad Assam kin nym lah satia ban thep kam Sorkar ha Assam.
U la ong ba kin don ki kyndon kiba pyrkhing bha na ka bynta ki samla pule kiba pyndep jingpule na ki skulbah shimet kiba don shabar ka Jylla Assam.
“Ka tnat aiñ jong ka Sorkar Assam ka dang thaw ki lad kumno ban khang ïa kito kiba pyndep jingpule na USTM ban ïoh kam sorkar ha Assam,” la byrthen u Sarma.
Haba pyntieng ïa ki samla pule kiba na Assam bad kim dei ban leit pule ha USTM, u Sarma u la kyntu ïa ki ban shim ka lad ban ïoh pule ei ha Assam ha ka jaka ban pynlut pisa ban leit pule ha ka skulbah shimet kaba don ha Meghalaya.
U Sarma u la kynnoh ba ka USTM ka pyrshang ban kheiñ hapoh ïa ki jaka pule kum ka Gauhati Medical College and Hospital (GMCH) da kaba tei la ka jong ka Medical College ha kaba ka la pyni ruh da kaba shu thok ba ki don ki nongpang ha ka por ba don ka jingjurip da ka National Medical Council.
U Myntri Rangbah ka Assam u la ong ba ka Sorkar Assam kan wanrah ïa ka aiñ kaba thymmai ka ban peit bha kumno ban ai jingbit sha kino kino ki kynhun kiba thmu ban seng ïa ki jaka pule hapoh ka Jylla bad haba ki wan ban seng ki dei ban pynbiang ïa ki kyndon.
U la ong ba naduh mynta, ki kynhun kiba kwah ban seng ki jaka pule kum ka Nursing College, Medical College, bad Dental College ki dei ban shim shwa ïa ka ‘Security Clearance’ na ka Sorkar Jylla namar baroh shi katta, kino kino kiba don pisa bad jaka, ki ïoh jingbit ban seng ki jaka pule.
Shuh shuh u la kynthoh ba ki don ruh ki kynhun kiba wan na Kerala ban seng skulbah ha Barak Valley bad Barpeta bad kum ïa kine donkam ban khmih bha ïa ka jinglong jingman jong ki namarba ki dei ruh kiba don ka jingartatien.
