Shillong, Nailar:
Ka Vellore Institute of Technology (VIT) ka la ïoh ïa ka kyrdan kaba ar kum ka jaka pule kaba bha tam ha India bad ha ka kyrdan ba nyngkong napdeng ki jaka pule shimet kiba don ha India ha ka Shanghai Academic Ranking of World Universities (ARWU) 2024 ïa kaba la pynmih dang shen.
Ka Vellore Institute of Technology (VIT) ka la ïoh ha ka kyrdan hapdeng ka 501 bad 600 napdeng ki skulbah ha ka pyrthei ha ka 2024 Shanghai Ranking, ïa kaba la tip ruh kum ka Shanghai ARWU (Academic Ranking of World Universities). Ka jingïoh ïa ka kyrdan Shanghai ARWU ïa ki skulbah katkum ki dak jong ka jingtreikam ha ka jingpule bad ka jingwad bniah, kynthup ïa ki samla pule barim bad ki nongtrei kiba la ïoh ïa ki khusnam Nobel Prizes, Field Medals, Highly Cited Researchers, ki kot wadbniah ba la pynmih ha ki kot khubor Nature bad Science, ki kot ba la buh kyrteng ha ki bynta ba kongsan jong ka jingpule, bad ka jingtreikam ha ka jingpule jong uwei pa uwei u briew jong ka jaka pule.
Ka ARWU jong ka Shanghai ka pyrkhat ïa ka jingbha bad jingbun jong ki jingmih na ka jingwad bniah. Ka Shanghai ARWU Ranking ka la pynmih ïa ka thup jong ki 1,000 tylli ki skulbah ba pawnam ha ka pyrthei ha une u snem ha kaba 15 tylli ki skulbah na India ki la don ha ka thup. Ka Indian Institute of Science (IISc), Bangalore ka la rung ha ka kyrdan 401-500 ha ka pyrthei baroh kawei katba ka don hakhmat eh ha ka thup jong ki skulbah ha India bad ka Vellore Institute of Technology (VIT) ka dei ka jaka pule kaba 2 kaba bha tam ha India katkum ka jingbuh kyrdan jong ka Shanghai ARWU Rangking Website.
