Nongpoh, Nailar 21
Ki nongïalam jong ka shnong Umroi Madan ha ka Sngi Balang ki la mih shakhmat ban pynshai paidbah ba kim don satia ïa ka jingpyrshah halor ka jingthmu ban shna ïa ka surok 4 laiñ lane ka 4-lane kaban pynïasoh naduh na lad Umïam ter ter shaduh sha Malidor.
Haba kren sha ki lad pathai khubor, u Bah Lamborlang Makri, Rangbah Shnong, bad kiwei ki la pynpaw ïa ka jingsngewkhia halor ka jingmih khubor ba ka shnong ka khlem leh eiei halor katei ka bynta.
Kitei ki nongïalam ki la pynshai ba ha ka jingshisha ka shnong lei tang mar ïa ïoh jingtip halor kane ka jingthmu jong ka sorkar jylla ban shna thymmai ïa katei ka surok, kum ki nongïalam shnong khlem da pynslem, ki la leit ban ai jingthoh sha u Deputy Commissioner ka Ri Bhoi ha u bnai Naiwieng jong u snem 2023 bad pyntip ruh ba na ka liang u DC u la phah syndon da ka jingthoh sha ka National Highways & Infrastructure Development Ltd (NHIDCL) bad ai ruh ïa ka kopi sha ka shnong ha u bnai Nohprah jong utei u juh hi u snem.
Ha kaba ïadei bad ka jingkynnoh ba katei ka jingthmu ban shna ïa ka surok 4 laiñ ban ïaid lyngba ka shnong ka ktah ïa ki tyllong umbam umdih, kitei ki nongïalam shnong ki la ïathuh na ka liang ka jongki ruh ki sngewkhia shisha lada jia ba ka tyllong umbam jong ka shnong kan shah ktah, hynrei kumba ki la dep ban leit jurip bad khmih dalade ryngkat ki bor sorkar, ki bynta jong ka jaka kaba thmu ban shna ïa katei ka surok kam ktah satia bad ka dang jngai na ki bynta jong ki tyllong um.
