Shillong, Nailar 21
U Symbud Myntri Rangbah ka Jylla, Bah Prestone Tynsong u la ong ba ka jingbym don ïa ki sabut kiba biang ka buh jingeh shi kat dei ïa ka tnad pulit haba phai sha ki kam khaïi briew.
“Lada ngi tip katno tylli ki kynhun ki don, katta ki la don ha along. Phi tip bha ba kane ka long kaba be-aiñ. Ki pynbeit hi para ma ki…hooid, ngi buddien na ka liang ki pulit, hynrei kumba nga ong ba teng-teng mar syn poi ka mukotduma ha ïingbishar, ki don shibun ki jingeh namar ngim don ïa ki sabut, naba hapoh ïingbishar hi, ngin hap wanrah ïa ki sabut,” ong u Bah Tynsong haba kren sha ki lad pathai khubor hadien ka jingïalang halor ka ‘Human Trafficking’ ba la pynlong da ka tnad pulit ka Jylla ha ryngkat ka jinïasnohktilang ka tnad kham pohïing ka Sorkar India ha ka Sngi Balang.
U la ong ruh ba kane kumta ka buh jingeh shi kat dei ïa ka Sorkar khamtam ïa ka tnad pulit ban ïaid shakhmat bad ka kam la ka long ha ka liang ka jingpynshitom.
Haba kylli, u la ong, “Ai lad ba kane ka jingïalang kan ïamir jingmut, ïakren bad lada ka lah ban aiti ïa ka jingtyrwa la ka long halor ki aiñ ka Sorkar Pdeng ne ki aiñ ka Jylla ban tehlakam ïa ki kam be-aiñ. Lada dei hapoh ka Jylla, ngin sa rah ha ka jingïalang ka Kynhun Myntri bad lada dei jong ka Sorkar India, ngin sa pynsangew sha ka tnad treikam ba dei khmih ka Sorkar Pdeng.”
Haba kdew ba ka kam khaïi briew ka don 2-3 bynta, u Symbud Myntri Rangbah u la ong ba don ki jait briew kiba kwah khaïi ïa ki shynrang ne khynnah kynthei ban pyntrei haduh ba kin da la heh la san bad ban pynlong ïa ki kum ki mraw.
“Sa kawei pat – ka jingpyntrei bylla khynnah namar ka kham tad lane ym donkam ai tulop bad kaba 3 pat ka dei na bynta ki kham khaïi met,” u la ong.
Haba pynsngew ba kam khaïi met ka long kaba i-shyrkhei, u Bah Tynsong u la ong, “Ki don ki kynhun kiba lehse kiba biang lut nadong-shadong, tangba ngi shu tip tang kumta, ban ong ba ngi da tip tikna ba ka don ka seng kaba kum kata…ngim lah.”
Ha kawei ka liang, u la bynrap ba na ka liang ka Sorkar ka ïaleh katba lah ban wad ki lad ki lynti ban teh lakam ïa kiba kum kine ki kam be-aiñ.
