Resubelpara, Nailar:
Ki pulit ka North Garo Hills (NGH) ki la kem noh ïa uwei u briew uba don bynta bad ka kynhun runar ban rahbor ïa u nongshong shnong ka Assam na Tura bad uba la lait salit hadien ba ki pulit ki la siat sha ki ha ka shnong Dudhnoi, Goalpara distrik ha Assam.
Katkum ki tyllong khubor na ki pulit, la ïoh jingtip halor ka jingdon jong uwei na ki dkhot katei ka kynhun kaba la lait da ka said hadien ka jingsiat jong ki pulit ba hap hapoh thanad Kharkutta. Hadien ba ïoh jingtip, ka kynhun pulit ka la her bran-bran bad kem noh ïa uwei u Ramu Ch. Marak, uba na Meghalaya hynrei uba la shongkha pat ha Assam.
Ma u lem bad kiwei-kiwei ki dkhot jong katei kajuh ka kyhun la kynnoh ba u don bynta ha ki kam runar ba shyrkhei bad la u nongïalam, uba long ruh u nonglam lynti ha katei ka jingrahbor – u dkhot ba snar jong kawei ka kynhun lehnoh. Kiwei pat kiba don bynta bad katei kajuh ka kynhun ki don hapdeng ka jingphet rieh.
Katkum ki tyllong khubor, u Ramu u la shah siat na kjat haba u la ïakynduh ïa ki pulit bad u la ïoh lad ban phet hashuwa ban kiew ha kawei ka ‘Electric Auto’. U la don hapdeng ka jingphet rieh hadien katei ka jingjia ha ka 18 tarik.
Utei uba la shah kem u la ieh noh ïa ka ‘Scooty’ kaba la wanrah sha katei ka jaka ban lum ïa ka pisa dawa kumjuh ïa ki ‘phone’ jong ki katba ki dang pyrshang ban phet na ki pulit. Ïa kine ki tiar la kurup noh hadien da ki pulit.
“Sa uwei u dkhot jong katei ka kynhun u la riew kuli na lbong. Une u don hapdeng ka jingphet rieh bad ngi dang wad lad ban kem ïa u. Kane ka kynhun ka ïa-khleh da kaba kynthup ïa ki jaidbynriew bapher-bapher hapoh ka jingïalam u lehnoh barim – uba don hapdeng ka jingphet rieh,” ong ki tyllong khubor.
Katkum ki tyllong khubor, ka kynhun ki runar ka la rahbor ïa u lanot ha ka 10 tarik Nailar na Tura. Hashuwa, ïa katei ka jingjia la shu ieh noh kumto bad kiba bun ki dang pyrkhat ba u lanot u la leit lang bad ki paralok. Ki pulit ki la ïoh jingtip hadien ba ki bahaïing jong u lanot ki la ïoh pdiang ïa ki jingdawa (ransom calls) na ka kynhun bad la ujor mukotduma ha Tura.
U lanot ïa uba la tip kyrteng kum u Sonamiya Sheikh (u nongtrei maw) u la shah rahbor ha ka kynhun runar bad hadien la ïalam ïa u sha Boko ha kaba la aiti ïa u sha kiwei pat ki dkhot jong katei kajuh ka kynhun. Hadien ba ki jingïakren (haba sdang) ki la pulom, ki nongrahbor ki la pyrshang pynïap ïa u lanot da kaba teh ïa ki kti ki kjat jong u bad pynngam jyllop ïa u ha kawei ka pung ha Boko, Assam.
Hynrei, u Sheikh u la lah ban pyllait im noh ïalade bad leit mih sha ki pulit Boko bad hadien la aiti sha ki pulit ka Meghalaya. Ki nongrahbor da kaba pyrkhat ba u la ïap, ki dang leh mynleh ba ki dang rahbor ïa u bad bteng ïa ka jingdawa pisa jong ki.
Haba sdang, ka jingdawa ka long T.50 lak hashuwa ban pynhiar sha ka T.7 lak hadien ka jingïakren bad ki bahaïing.
Ki pulit ki la pynap shrip ïa ki, kaba la ïalam pat sha ka jingïasiat kaba la jia ha Dudhnoi ha ka 18 tarik Nailar ha kaba ki 2 ngut ki dkhot katei ka kynhun ki la ïoh lad ban phet krad ha ryngkat ka jingriew kuli. U Ramu u la shah kem noh shi sngi hadien jong katei ka jingjia – 19 tarik.
Ki tyllong khubor ki ïathuh ba la pynlong ïa ka jingtohkit ba mardor watla ym shym la lap ksai ha kaba sdang. Ka jinglap ksai ka la wan hadien ba u lanot u la ïoh pyllait im ïalade na katei ka jingthmu shah pynïap.
