Nongpoh, Nailar 21
Ki pulit ka Ri-Bhoi ki la ïoh ban kem noh ïa lai ngut ki dkhot ba la kam ba ki dei na ka kynhun Hynñiewtrep National Liberation Council (HNLC) bad ïa kiba la kynnoh ba ki la thmu ban pynbthei bom IED ha ka 14 bad 15 tarik mynta u bnai.
Ka jingïoh kem ïa kine ki lai ngut ka la wan hadien ka jingïoh ïa ka jingtip kaba bniah ba u don uwei u briew ba la tip kyrteng kum u Equest Langsiang, 31 snem ïa uba la suba kum u dkhot ka HNLC uba la ïasylla bad ki dkhot ka HNLC kiba don ha Bangladesh bad kiwei ki briew kiba ym lah ban ithuh kiba la thmu ban leit buh bom IED ha kylleng ki jaka ha rilum Khasi bad Jaintia.
Ha ka kyrwoh khubor ba la pyllait da u Superintendent of Police (SP) ka Ri-Bhoi u Jagpal Singh Dhanoa, IPS u la ïathuh ba ïa u Equest Langsiang la ïoh ban bat na ka lad Bethany Hospital, Nongpoh ha ka 20 tarik Nailar ha ka por kumba 12:30 mynstep, bad ha kaba la ïoh ruh ki sabut na ka phone ka jong u, ïa kaba la kurup noh.
Na ka liang jong ki pulit ki la pynrung da ka ejaharha thanad Nongpoh katkum ka Case No.87(08)2024 U/s 113 (3) (5) BNS ha kaba ïadei bad ka jingshah kem jong u Langsiang.
La ong ba ha ka jingpynlong ïa ka jingtohkit, u Equest Langsiang u la kubur ba u dei u dkhot jong ka HNLC bad uba la thmu ban leit buh bom IED ryngkat bad kiwei pat ki dkhot ka HNLC. Ha kajuh ka por, u Dhanoa u la ong ba u Langsiang u la phla ïa ka kyrteng jong kiwei ki ar ngut pat kiba la donkti ha kane ka kam.
Ïa kine ki ar ngut kiwei pat kiba la tip kyrteng kum u Deiborlangki Sariang, 31 snem, la ïoh ban kem noh na Nartiang bad ïa uwei pat uba la tip kyrteng kum u Markhlan Biam, 34 snem, la ïoh ban kem na Jowai.
U SP u la ong ba kine ki ar ngut ruh ki la kubur ba ki dei ki dkhot jong ka HNLC bad ki la thmu ban leit buh bad pynbthei bom IED ha ka 14 bad 15 tarik Nailar hadien ka jingbthah da ki nongïalam ka HNLC na Bangladesh.
