Jowai, Nailar:
Wat hapdeng ka jingther u ‘lapbah, ka lehniam Behdeiñkhlam kabakhatduh eh jong u snem kaba la pyndep da ka Seinraij Mukhla ha Rilum Jaiñtia kala poi noh sha kaba kut ha ka Sngi Ba-Ar hapdeng ka jingiphuh iphieng.
U Myntri ka sorkar Jylla, u Bah Kyrmen Shylla u la wan sakhi ïa ka jinglehniam ha ka jingdonlang u MLA ka Jowai u Bah Wailadmiki Shylla, ki MDC jong ka JHADC, u Doloi Nangbah, ki nongïalam Seiñ Raij na Jowai, Tuber bad na kiwei kiwei.
“Watla ïa ka khlam jingpang Coronavirus kaba ym shym la poi pyrkhat ba kan duh kan dam, la lah ban pynduh ïa ka ha ka jylla, nga pynpaw ïa ka jingsngewkhia pat namar bym lah pat ban pynduh pyndam ïa ki katto katne ki khlam kiba don ha ki riew shimet kumjuh ki longïing longsem bad kata ka dei ka bishni, ka at-nud bad ka jingpeit poh iwei ïa iwei,” la ong u Bah Kyrmen bad bynrap ba u don ka jingkyrmen ba lyngba jong kane ka Behdeiñkhlam yn lah ruh ban beh ïa kane ka khlam na uwei pa uwei u briew.
U la aikhublei bad kitbok kitrwiang ïa baroh ki khun ka Seiñraij Mukhla ban ïoh ka met ka phat kaba koit ba khiah, ban bha ka rep ka riang bad ban ïoh ka kamai kajih kaba dap ba biang.
Ka Seiñ Raij Mukhla man u snem ka la pynlong ïa kane ka lehniam ha ki saw sngi lynter bad mynta u snem kane ka lehniam ka la sdang naduh ka 17 tarik Nailar. Ha kane ka lehniam ka la don ki jingkñia bapher bapher kiba kynthup ïa ka leit pom dieng Blai ne Khnong lai tylli, ïa kine ki dieng Blai la wanrah sha madan Tih Khyndaw.
Ha kane ka sngi pynkut ka la don ka kynting khnong Blai bad ka kñia Khlam Ram Shyllang kaba la leh ha duwan kñia kaba don hajan ka Law Kyntang ka shnong Mukhla, ka la don ruh ka kñia Ryngkaw bad ka Tyngkhaiñ Khnong bad ïa kine ki khnong la wanrah sha Biar bud pat sa ka jingwanrah ïa ki rot sha ka Biar.
Ha ka nohphai sngi u Langdoh, u Sangot, ki Maji, u Chutia bad ki riew rangbah ki la ïakynduh ha madan Slot Masi bad la wanrah ruh shi jaka ïa ki lai tylli ki tabut ba la wanrah da ka Umlangshor, Neiñshnong bad Wahshnong ban pynhiar sha Aitnar.
Hashwa ban pynhiar ïa ki tabut, la pynhiar shwa ïa ki lai tylli ki Deiñkhlam ba la pynïeng hynnin ka sngi ha madan Tihkhyndaw bad hadien ba la pynhiar lut ïa ki deiñkhlam la pynhiar sa ïa ki rong ryngkat ka bom ka bhuri bad ka shad ka kmen.
Mynta u snem la don haduh 13 tylli ki tabut kiba la wanrah sha ka Biar ryngkat ka shad ka kmen ka risa ka kynhoi bad hadien bala dep ban pynshad ïa ki tabut, la bret pat ïa ki kum ka dak ka jingpynkutïa ka lehniam Behdeñkhlam.
