Shillong, Nailar 21
Ha kawei na ki jingjia kaba la pynpar ‘ñiang khriat ïa kiba bun balang khamtam ki kmie ki kpa kiba phah skul ïa ki khun ba dang rit ha kaba kane ka jingjia ka la jia ha kawei ka skul ïa kaba la tip kum ka St. Francis kaba don ha Umbir, Ri Bhoi District ha kaba uwei u khynnah u ba dang 8 snem ka rta u la shah shoh ha u nongpeit ne ‘Warden’ jong ka hostel ïa uba la tip kyrteng kum u Shanbor Kurbah uba la shoh khlem jingisynei wat hadien ba une u khynnah u la panmap kat haduh ba ka met jong une u khynnah baroh kawei ka la jngem lut.
Na ka liang U Nongsaiñ Hima haba pyrshang ban ïakren bad ka kmie jong utei u khynnah, ka Kong Kordilia Kharryngki ka la ïathuh ba ha ka por ba leit ban siew ïa ka bai skul jong u khun ha ka 13 tarik Nailar 2024, ka la lap bad ïohi ïa ka jinglong-jingman jong u khun bad ka dei ha kata ka por ka sa tip ba u khun jong ka u la shah shoh ha u ‘Warden’.
Ka Kong Kharryngki ka la ïathuh ba ynda ka la kylli ïa u khun jong ka halor kane ka jingjia, utei u khun u la ïathuh ba utei u nongap u la shoh ha ka por ba la wai skul bad ha ka sngi kaba bud pat, utei u khynnah u la ïathuh ha ka kmie jong u ba u khlem leit skul satia namar ka jingsngew shitom ha ka met.
Katei ka kmie ka la ïathuh ruh ba ka lap ïa katei ka jingjia hadien shi taïew ba u khun jong ka u la shah shoh ha utei u nongap jong ka hostel bad ha ka por ba ka la lap ruh, ki dak jngem ki dang don sah.
“Hadien shi taïew nga lap ba la jngem lut haduh ba ki khohsiew, ki lbong, ki kjat ruh ha ka por ba nga ïohi nyngkong um lah ïaid bha. Ka met lei la long kumba kynthah da u nar-saw bad ka la long phler bad ki khohsiew nadien la long kumba eh u maw,” ïathuh ka Kong Kharryngki.
Shuh shuh katei ka kmie ka la ïathuh ba marsyn tip halor ka jingshah leh u khun jong ka kumta, ka la shu ïam bad dap da ka jingsngewsih ban tip ba ka jingbuh jong ka ïa u khun ha katei ka jaka pule ka long ba un ïoh jingnang jingstad hynrei ka la long pynban da kumwei.
Na ka liang katei ka kmie ka la ïathuh ba haba ka la kylli ïa utei u nongap halor ka daw ba u la shoh ïa u khun jong ka, utei u nongap u la ong ba ka daw ka dei namar ba u khun jong ka um lah kot.
Na ka liang ka Kong Kordilia ka la ong ba ka la dep ban pyntip ïa kane ka jingjia sha u Principal jong ka skul hynrei na ka liang u Principal u la kam ba um don jingtip eiei shaphang kane ka jingjia.
Halor kane ka jingjia, na ka liang ki bahaïing hasem jong utei u khynnah ki la ujor noh da ka ejahar ha thanat Mawlai bad la ong ruh ba kat haduh mynta ym pat shym la kem satia ïa une u ‘Warden’ uba la donkti ban shoh ïa utei u khynnah jong ka skul St Francis, u bah Shanbor Kurbah.
“Na ka liang ka ïing ka sem ngi kwah ïa ka jingbishar kaba hok khnang ba kiwei ki khynnah kiba sah hangto kin nym jia shuh kumne,” la ong ka Kong Kharryngki.
