Shillong Nailar 20
U Working President ka National People’s Party (NPP) u Bah Hamletson Dohling u la ong ba ka jingkynnoh jong u President ka Congress, u Bah Vincent H Pala, ba ka NPP ka pyndonkam da ka pisa ban pynphet ïa ki lai ngut ki MLA ka Congress ka dei ka bym don nongrim bad ka jingkren kut lad.
U Bah Dohling u la ong ba ki MLA ka Congress ki wan sha ka NPP namarba ki ïohi ïa ka jingtreikam ka Sorkar bad ki dei kiba kwah ban trei na ka bynta ka jingmyntoi ki paidbah ym ba ki wan na ka bynta ba ki shah thied ne na ka bynta ka jingmyntoi shimet.
U la ong ba ka Congress bad u Bah Pala ki dei ban peit shwa ïa ka ïing lajong bad buh jingkylli balei ki MLA ki phet noh, ym ban kynnoh ïa kiwei khamtam ban kynnoh khlem nongrim ba ka NPP ka thied ïa ki MLA da ka pisa.
“Kum kato ka jingkren dei ban pynrem bad ka Congress ka dei ban peit shwa ïa ka ïing lajong ha kaba ïadei bad ka jingphet ki MLA sha ka NPP,” la bynrap u Bah Hamlet.
Ki lai ngut ki MLA ka Congress kiba kynthup ïa u Dr Celestine Lyngdoh (Umsning), Bah Gabriel Wahlang (Nongstoiñ) bad Bah Charles Marngar (Mawhati) ki la iehnoh ïa ka Congress bad leit ban ïasoh bad ka NPP ha ka 19 tarik Nailar.
