Mawkyrwat, Nailar:
Ka kur Palïar Mawkyrda Lai kpoh Lai Kynthei kaba kynthup ïa ka kpoh Bah Kpoh Mawpyrdoi bad Kpoh Sanglein kiba dei hok ki nongri nongsumar ïa ka khyndew ka shyiap jong ka kur hadien ka jingmih ka huri hura bad ka jingjia ba sngewsih ha ka 14 tarik Nailar ha Nongdiloiñ ha kaba ka la don ka jingïasiat bad mynsaw haduh 5 ngut ki briew, ha ka 19 tarik u Nailar 2024 ka la lum ïa ka Dorbar kur Paliar Laikpoh ban ïa pynbeit ïa kitei ki kynrum kynram hapoh ka shnong Demnar ha South West Khasi Hills District.
Hadien ka jingïalang na ka lïang ka Dorbar Kur Paliar Laikpoh lyngba u Adviser u Bah Breswell Palïar haba kren sha ki lad pathai khubor u la kynnoh ba dei na ka daw u Syiem jong ka Hima Nobosohphoh ba sa mih katei ka huri hura bad ka jingkulmar hapoh jong ka kur namar ka jingpynïaid bakla bad ka jingleh donbor jong u ban weng bad ban thung Lyngdoh katba u mon khlem da pyntip ïa ka kur, kaba ha ka jingshisha kam dei ka kam jong u hynrei ka dei ka kam jong ka kur ban jied ne weng ïa ki Lyngdoh.
U Bah Breswell u la kynnoh ruh ba ka jingmih ka huri hura ha ïew Umdohlun ha ka 14 tarik ka dei na u Phaiborlin Paliar, u Acting Lyngdoh ba la thung jubor da u Syiem bad u la ïathuh ruh ba ym tang shisien ba u Bah Phaiborlin u la wan pynwit hynrei man ka por watla ka ïingbishar High Court ka la aibor ïa u Josingwell Palïar ba un pyndep ban lum ïa ka bai musur haduh 6 taïew.
Shuh shuh u Bah Breswell u la ïathuh ruh ba wat hapdeng kitei ki jingkulmar bad ki kynrum kynram kiba jïa na ka por sha ka por ha ïew Umdohlun kaba la jïa naduh u bnai Ïaïong 2024 hynrei kaba sngewsih u Syiem um shym la wan mih wat tang shisien ruh ban ïa pynbeit ne pynïasuk.
Kumta ka kur Paliar Mawkyrda Lai Kpoh Lai Kynthei ka dawa ïa u Syiem ba u dei ban bah khlieh halor ka jingjia kaba la jïa ha ka 14 tarik hapdeng u paidbhur bad ka ïing jong u Phaiborlin Paliar bad dawa ruh na ki bor jong ka aiñ bad ka District Council ba kin leh eiei ïa une u Syiem uba la pynmih ïa ka huri hura hapoh jong ka kur.
