Shillong, Naitung 19
Ka jingbym pat paw ki dak ne sienjam ban shna ïa ka surok ba la dkut harum Laitlyngkot la jan shi bnai mynta kaba la pynsohsat ïa ka leit ka wan sha thaiñ Pynursla bad Ri-War Mihngi, ka la pynlong ïa ki ar tylli ki kynhun sengbhalang ban pynbna ba kin mih hi noh ha ryngkat u paidbah ban shna ïa ki bynta ba dang donlad ha katei ka jaka kumba 5 meter eiei ban pyllait ïa ka leit ka wan ki kali.
Kine ki kynhun sengbhalang ki kynthup ïa ka Khasi Students Union (KSU) South Central East Circle bad Federation of Khasi Jaintia and Garo People (FKJGP) Ri-War Mihngi Circle.
Haba kren sha ki lad pathai khubor hadien ka jingïalang ha Pynursla, ki ar seng ki la pynbna ba yn sdang ïa kane ka kam naduh ka 23 tarik u Naitung 2026 bad ïawer ïa baroh ban ïadon bynta naduh ki synjuk nongñiah kali kamai, ki trok bad kiwei-kiwei ha kane ka sienjam ka seng.
U Bah Evanfield Khonglam, President ka FKJGP Ri-War Mihngi Circle ha ryngkat u Bah Basuklang Khongwar, Vice President ka KSU SCEC ki la ong ba dang shen ki la wan ïakren bad u Executive Director ka NHIDCL, hynrei u pynpaw ïa ki jingeh ki bym sngewthuh sngewthaw bad ong ba dang phah jingtyrwa sha ka Ministry of Road Transport and Highway ban mang tyngka ban shna ïa ka surok kaba la dkut kumta ki la ong ba kane ka rukom treikam kan dang jngai ban pyndep.
Ki la ong ba mynshwa ïa ki jinglynniar la ïohsngew namar ka jingïap briew ha shi lynter kane ka surok, hynrei nangne sha khmat yn ïoh sngew pat ïa ka jinglynñiar ki nongshong shnong ka thaiñ ba ki ïap thngan.
Shuh shuh ki la ong ba ïa mynta ka dor marbam mardih kam pat kiew, hynrei ki tiar hardware kum ki nar rot, dewbilat bad kiwei-kiwei ki la sdang kiew dor.
Da kaba kdew ruh ba ka daw ka long ba ki kali heh ym shah ban ïaid lyngba ka jingkieng Wah Rew hap ïaid lyngba ka Sohra bad jingkieng Dawki haba wan na Amlarem, ki la ong ba ka buh jingeh ban wanrah ïa ki tiar trei ïing bad kiwei-kiwei ki tiar khia.
Ki la bynrap ba kim kynnoh shimet ïano-ïano halor ka jingleh sting, hynrei ki kynnoh kyllum ïa u Bah Prestone Tynsong, MLA ka Pynursla Constituency bad Symbud Myntri Rangbah, ka Sorkar MDA, ka NHIDCL bad ka Company ba pyntrei ïa ka surok.
Halor ka jingsaphriang ki jingai jingtip ba u MLA jong ki u leit peit Football World Cup sha Ri America hapdeng ka jingkordit bad sohsat ki nongshong shnong ka thaiñ, ki nongïalam ki la ong ba kim lah ban ong eiei ïa ka kam shimet u briew, hynrei lada u MLA jong ki u leit peit World Cup ne u don shaei-shaei ruh u dei ban wan noh ban ïashna surok.
