Shillong, Naitung 19
Ka National People’s Party (NPP) ka la nangïoh bor bad nangkhlaiñ shwa ban wan ka ilekshon MP shiteng samoi hadien ba da ki spah ngut ki nongkyrshan bad nongïalam jong ka Voice of the People Party (VPP) ki la pynïasoh noh ïalade bad ka NPP.
Ïa ka jingïalang ban pdiang ïa kine ki nongkyrshan bad nongïalam ka VPP sha ka NPP, la pynlong ha ka sngi Saitjaiñ ha ka shnong Nongjngi ha West Jaiñtia Hills, ha kaba u National Vice President ka NPP u Bah Sniawbhalang Dhar uba long ruh u Symbud Myntri Rangbah u la ïadonlang.
Ka Nongjngi ka dei ka konstitwensi kaba la mihkhmat da u MDC ka VPP.
U Bah Sniawbhalang u la ong ba ka rai jong ki nongtrei ka VPP ban ïasoh sha ka NPP ka pyni ba ki briew ka thaiñ kila bishar ïa ka jingtreikam ki seng saiñpyrthei bad kwah ban ïadonlang bad ka Sorkar na ka bynta ka roi ka par.
U la ong, “Lyngba ka jingïatreilang, ngin lah ban wanrah ïa ki kam pynroi kumba phi, ki nongshong shnong, phi kwah. Ka saiñ pyrthei kam lah ban pynhun ïa baroh. Hynrei haba ngi ïatreilang, ngi lah ban leh shibun kiei kiei kaba u paidbah u kwah.”
U la kyntu ruh ïa kine ki dkhot ba thymmai ba kin kren pynsngewthuh lem sha la ki jong ki bahaïing hasem bad ki marjan marpa.
“Ïathuh ïa ki bahaïing hasem, ngi ki paidbah ka Lumstong ngi la pyrkhat thymmai. Mynta ka la dei sa ka pali jong phi ban ïawanlang noh,” ong u Bah Sniawbhalang.
Da ka jingnang jan jong ka ilekshon shiteng samoi ka Shillong Parliamentary, u Bah Sniawbhalang u la buh ïa ka thong kaba shai na ka bynta ka shnong, kaba don palat 6000 ngut ki nongthep vote.
“Ka thong jong ngi ha ka ilekshon MP shiteng samoi ka long ba lada long kumno kumno ruh, ngi dei ban ïoh ym duna ïa ka 4000 vote. Lada ngi ïoh 4000 vote na kane ka thaiñ, ngan sa pyni ïa ka kam na ka bynta ka shnong Nongjngi kaba baroh kin sa sah jingkynmaw,” u la ong.
U Symbud Myntri Rangbah u la pynpaw ruh ba u don kumba 700 ngut ki nongtrei ka seng tang ha ka shnong Nongjgi bad u la leit ïakynduh dalade ïa ki nongshong shnong, kam pher la ki dei na kano kano ka seng.
Haba kynthoh pyrshah ïa ka VPP, u Bah Sniawbhalang u la ong ba ki nongthep vote kila sngewthuh ba ka jingkyrshan ba ki ai sha ka VPP ha ki ilekshon bala dep ka dei kaba shah ïalam bakla.
“Don kiba ong ba ngi la leh bakla namar ba ngi la ngop ha ka jingrwai jong ki bad ngi la leit ban kyrshan ïa ka seng Prah. Nga sngewthuh- haba ki riew rangbah bad ki nongïalam ki ïeng ha ka nongrim, ki paidbah ki ïabud ïa ki,” u la ong.
“Hynrei nga kmen ba ha kine ki shi lane ar snem, ki paidbah ka Lumstong kila sngewthuh ba ka lynti ba ki shim hashuwa ban kyrshan ïa ka VPP ka dei ka lynti kaba bakla,” bynrap u Bah Sniawbhalang.
