Shillong, Naitung 19
U Samla Kitkupar Nongsiej u nongrwai ba la paw ha ka Jylla, u la thaw ïa ka histori ban sah kynmaw ha kam rwai hapoh ka Ri India, ha kaba u la ïoh ban rung sha ka Grand Finale jong ka World Championships of Performing Arts (WCOPA) 2026 kaba dang long mynta ha Las Vegas, Nevada, USA.
U Samla Kitkupar u ïoh rung sha ka Grand Finale dei hadien ba u la lah ban rwai bha ha ka Semi-Final kaba la long ha ka miet jong ka 18 tarik u Naitung 2026 bad ba ki nongpynïaid jong katei ka jingïakop ki la pynbna ïa ka risol kaba pynthikna ba u ne u samla Khasi u la shah jied ban ïakhun ha ka Final, ïa ka Grand Finale, la buh ba kan long ha ka miet jong ka 20 tarik u Jylliew 2026.
Ha kane ka jingpynkut kaba itynnad bha, ki nongrwai ba tbit tam ha ka pyrthei kin ïakhun ban ïoh ïa ki nam lahduh, ha kaba ïa u nongjop ba pura yn pynkup burom kum u nongrwai ba pawnam tam jong ka pyrthei baroh kawei.
U Samla Kitkupar u dei na ka shnong Kynshi kaba hap hapoh ka Eastern West Khasi Hills District, Meghalaya bad u la sdang ban pawnam hadien ba u la jop ha ki katto katne ki jingiakop rwai kiba long ha ka Jylla bad kaba la pynlong ïa u ban ïoh mihkhmat na ka Ri India ha ka jingïakop rwai jong ka pyrthei baroh kawei.
U Samla Kitkupar haba pynpaw ïa ka jingsngew ba u la ïohlad ban mih khmat na ka Ri India sha ka jingïakop baheh ha ka pyrthei u la pynpaw ïa ka jingsngewnguh ïa U Blei, ïa ki kmie ki kpa bad baroh kiba la don bynta ha ka ban ai mynsiem bad kyntiew ïa u sha ka kyrdan kaba u long mynta.
Shuh-shuh haba ïakren shaphang ka jingpynkhreh jong u na ka bynta ka Final u la ong, ban ïoh rung sha ka Final ka long ka burom kaba khraw, hynrei ka jingïaid lynti kam pat kut, u la pynpaw ba un dang ïai bteng ban pynkhreh bha, ban pynleit jingmut, ban ai kaba bhatam ha kane ka kynti. “Nga tip ba ngan ïakhun pyrshah ïa ki katto katne ki nongrwai kiba tbit tam na kylleng ka pyrthei, hynrei ngan ïaleh da ka jingshaniah, ka jingsngewrit bad da ka jingkymen ban wanrah ïa ka jingkmen ïa ïa Ri kumju ïa ka Meghalaya kaba sngewsarong,” u la ong.
