Mawkyrwat, Naitung 19
Hadien lai snem duna ba u Nangtei Singh Syiemiong, Syiem ka Hima Langrin u la shah sospon noh ha ka EC barim jong ka District Council ha kaba la don ka jingshah ujor pyrshah ïa u ha ki riew rangbah ka hima ba u Syiem u la leh donbor ban pynïaid ïa ka hima artylli da artyli ki bor synshar (Dual Authority) kata da ka Management Board bad ka hima bad la kynnoh ruh ba u Syiem u la pyndonkam bakla ïa ka pisa hima.
Hadien ka jingbishar bniah ïa baroh ki kot ki sla kaba la neh kumba ar snem duna bad katkum ka kaiphod (Inquiry Report) la lap ba u Nangtei Singh Syiemiong um shim la pynïaid bakla ïa ka synshar khadar bad katkum ka kaiphod la lap ba ka jingpynïaid ïa ka hima ka long kaba beit bad kam don ka jingpyndonkam bakla ïa ka pisa kumba la kynnoh.
Kumta ka EC ba thymmai jong ka District Council hapoh ka jingïalam u Bah Winston Tony Lyngdoh, CEM ka KHADC ha ka 15 tarik u Naitung, 2026 ka la pynmih ïa ka hukum ba la pynskhem biang ïa u Nangtei Singh Syiemiong kum u Syiem ba pura ha Hima Langrin ba un bteng ïa ka synshar khadar katba ïa u Acting Syiem Bah Bryllyen Henry Syiemiong la pynduh pyndam noh ïa ka jinglong Acting Syiem jong u.
U Paiem Nangtei Syiemiong haba ai jingkren sha ki lad pathai khubor u la ai khublei kyrpang ïa u CEM ka KHADC bad ïa ka EC ba thymmai kiba la shim ïa ka sienjam ban wanrah biang ïa u kum u Syiem ka Hima Langrin.
U la ïathuh ruh ba kiwei pat ki daw kiba la ujor pyrshah ïa u ha kaba u la shah sospon ka dei ka jingkynnoh ba u Syiem u pynïaid ïa ka hima da ki artylli ki bor synshar (dual authority) da ka management board bad ka hima.
Ha kaba ïadei bad kane, u Paiem Nangtei Syiemiong u la pynshai ba ka management board kam dei kaba pynïaid ïa ka hima kumba la kynnoh hynrei ka dei kaba pynïaid tang ïa ki ar tylli ki khyndew ka LawLyngngam Tila bad ka Pynden Tanglieh kiba dei ki jaka kiba don ha ka jingïaleh mukotduma naduh ki snem 199O bad la lah ban ïa beit ïasuk ïa kane ka mukotduma ha u snem 2010 ha ka por ka jinglong Syiem jong u bad ha kata ka por ka la don ka jingmynjur ha ka Dorbar Hima naduh ki Myntri ki Lyngdoh bad ki khun ki hajar jong ka hima.
Namar kata ka jingkynnoh ba ka management board ka tuklar ïa ka kam hima ka long kaba bakla, la ong u Paiem namar ka management board ka peit tang ïa ki jingmih jingïoh na kine ki artylli ki khyndew.
Kumta u Paiem Nangtei Syiemiong u khot u wer khamtam ïa ki khun samla ka hima ki bym pat sngewthuh ne tip ïa ka jingshisha bad kiba dangrit ha kito ki por ba u kwah ban pynshai ba ka management board kam don bynta ïa ka bor synshar, kam tuklar ïa ka musur ïew bad kiwei kiwei ki jingmih hynrei ka peit tang ïa ki jingmih na ka khyndew jong kine ki artylli ki jaka katba ïa ka bor synshar la peit hi da ka hima.
Halor jingwanphai biang u Bah Nangtei Singh Syiemiong kum u Syiem ba pura ha Hima Langrin, na ka liang ki khun ki hajar, ki Lyngdoh ki Myntri bad ki sordar shnong ha ka 18 tarik u Naitung 2026 ryngkat ka jingkmen ki la pdiang burom ïa u ha ophis Syiem kaba don ha Plangdiloiñ, South West Khasi Hills District.
