Shillong, Naitung 19
Ki pulit jong ka jylla Karnataka ki la lap tang ïa ka mobile phone jong u samla Khasi uba kyrteng u Kwis Sumer uba dang 23 snem ka rta uba na ka shnong Muktapur ha West Jaiñtia Hills haba u la jah ha Bangalore ha ka 13 tarik mynta u bnai.
Ka jingjah jong une u samla naduh 13 tarik haduh mynta ka sngi 19 tarik ka la long kumba 6 sngi hynrei ki pulit ki dang wad ïa u.
Haba ïakren bad u President ka KSU Bangalore Unit u samla Donboklang Nongphut u la ïathuh ba katkum ka jingpyntip kiba haïing na Muktapur une u samla u la mih na shnong ha ka 10 tarik mynta u bnai ban wan sha Bangalore ban leit bylla ha kawei ka jaka uba la don lypa uwei u para shnong uba tip kyrteng kum u Sanu Lamare.
U la ïathuh ba une u samla na Muktapur u la poi sha Bangalore da ka rel ha ka 13 tarik mynta hi u bnai hynrei haba u la wad ïa ka rel kaba dei ban leit sha jaka ba la don u Bah Sanu um shym la lap bad naduh kane ka sngi ym lap shuh ïa une u Kwis.
“Haba kiba haïing ki la ai ejahar, ki pulit ka Karnataka ruh ki la ïawad lang hynrei mynta ka sngi ngi la ïoh jingtip ba ki pulit ki la lap ïa ka phone haba wan aiti ki paidbah kiba la lap ha kawei ka shnong,” u la ong.
U samla Donboklang u la ïathuh ba lashai ka sngi un sa hiar ha katei ka thanad ban leit pynthikna ïa kane ka phone.
“Na ka liang jong ngi ki dkhot ka KSU Bangalore unit ngi la phah lut ïa ki jingpyntip shapoh Karnataka ban ïarap wad lem ïa une u samla,” u la ong biang.
Shuh shuh u la ïathuh ba une u Sanu uba la don lypa sha Karnataka u la batai da ka phone ban shong rel na Bangalore kaba jngai haduh 9 kynta hynrei namar bym lap ïa kata ka rel u la jah noh.
U la pyntip ba une u samla na Muktapur u dei uba la wan bylla teng kham mynshwa ha Tamil Nadu bad u la kham tip ïa ka leit ka wan haba u shong rel hynrei um tip na kaei ka daw ba u jah lynti haba u wan sha Bangalore.
Shuh shuh u la ïathuh katba dang shah thok ha ki briew kiba tyrwa kam ha Karnataka hynrei ym tip na kaei ka daw ba ki samla ki dang wan bylla sha kane ka jaka.
Kumban shu pynkynmaw na ka liang ka kmie jong u Kwis ha ka 15 tarik mynta u bnai ka la leit ujor da ka ejahar sha ki pulit ka Muktapur Police Patrol Post ban pyntip ba u khun u la jah ha Bangalore naduh ka 13 tarik mynta hi u bnai.
