Nongstoiñ, Nailar:
Wat hadien lai snem ba ka Rambrai C&RD Block kala kynjoh naduh bala plie paidbah ïa ka hynrei la ong ba haduh mynta kane ka block ka dang don hapdeng kiba bun ki jingdkoh ha ka jingtrei kam.
Ïa kane la lap da ka Hynñiewtrep Youth Council (HYC) Rambrai Circle hadien ba ki la pynlong ïa ka jingjurip ha ka 19 tarik mynta u bnai hapoh ka jingïalam u President Bah Plielad Mawlieh bad u General Secretary Bah Bankit Marweiñ.
Ka kyrwoh khubor na ki nongïalam ka HYC la ong ba katei ka jingleit ban jurip ïa ka tnat treikam ka long ruh halor ka jingïoh ujor na ki paidbah nongshong shnong jong ka thaiñ, namar ka jingbym don tista ki nongtrei bad khamtam u BDO.
Shuh shuh ki la ïathuh ba ha kane ka jingleit jurip, ka HYC ka la lap ba wat ka signboard ruh ym shym la don bad la lap ruh ba ki shuki ki thylli bad ym don nongtrei bad wat ïa ka shlem treikam ruh la lap ba la khnang tala.
“Kum ka seng, ngi pynpaw ïa ka jingsngew bynñiaw kaba jur halor kane ka bynta,” ong ki nongïalam bad ban bynrap ruh ba ka seng ka pynkynmaw ïa ki juban lak kiba la khlei da u Myntri Rangbah ka jylla u Conrad K Sangma ha ka por ba u la plie ïa ka Rambrai Block ba u la ong, “Ngin sa pyntrei noh pura ïa kane ka C&RD Block khnang ba ki paidbah ka thaiñ kin suk hynrei wat haduh mynta ba la dap lai snem ruh ym pat i don dak eiei.”
Shuh shuh ka HYC ka la pynpaw ruh ba katkum ka jingujor na ki paidbah ka long ba ki shem jingeh wat tang ban pan ïa ki kot donkam kum ki residential certificate bad kiwei kiwei namar bym don BDO.
“Ka khubor kaba shai sha ka sorkar ba lada kam lah ban pyntreikam pura kumba la kular, ka bha ban khang tala shi syndon khnang ba ki paidbah kin ym sah ha ka umdum kumba long mynta,” pynkut ka kyrwoh na u General Secretary ka seng.
