Shillong Nailar 21
U Symbud Myntri Rang-bah, u Bah Sniawbhalang Dhar uba dei ruh u nongïalam ka NPP u la ong ba ka jingïatreilang bad ki paralok kiba la donlang ha ka kynhun Meghalaya Democratic Alliance (MDA) kan ïai bteng haduh bakut ka samoi treikam baroh san snem kam pher wat haba ka NPP ka la don 31 ngut ki MLA, bad ka jingïatreilang ka lah ban bteng kham palat ïa u snem 2028.
“Ngi la ïatreilang bad ka United Democratic Party (UDP) naduh u snem 2018 bad ngin bteng ban ïatreilang haduh bakut kane ka samoi bad lehse kan bteng ruh kham palat u snem 2028,” la ong u Bah Dhar haba kren sha ki lad pathai khubor ha ka Sngi Balang.
U Bah Dhar u la pynpaw ïa kane haba buh jingkylli la ka NPP kan kyntait noh ïa kiwei ki seng kum ka UDP bad HSPDP namarba mynta ka la ïoh 31 ngut ki MLA da ka jingwan ïasoh sa lai ngut ki MLA ka Congress. U la ong ruh ba kan nym don ka jingbujli Myntri hapoh ka Sorkar MDA hadien ka jingwan ïasoh ki lai ngut ki MLA ka Congress namar ki lai ngut ki MLA ka Congress ki wan hi ban ïasoh na ka bynta ki kam pynroi ban myntoi ki paidbah.
Haba kylli la NPP ka tan ïa ki 3 ngut ki MLA ban pyntroiñ syndon ïa ka Congress ha Meghalaya khamtam hashwa ban leit sha ka ilekshon shiteng samoi ha Gambegre konstitwensi, u Bah Sniawbhalang u la ong ba ka NPP ka khlem tan ïa ki MLA, hynrei ki MLA ki wan hi dalade da ka mon jong ki ban ïatreilang na ka bynta ka roi ka kiew ha ki konstitwensi bad ka Jylla.
Haba kylli, hato ki kam pynroi ki tuid tang lada don ha ka Sorkar, u la ong ba ki kam pynroi ki dei ïa baroh hynrei haba don ha ka Sorkar ki kham tam bad kham ïoh shuh shuh ki jingmyntoi na ka bynta ki paidbah.
