Nongstoiñ, Nailar 21
Ban ïakren ïapyrkhat lang para Nonghikai da kino ki lad jingïakhih yn shim halor ka jingleh bym patiaw jong ka Sorkar Meghalaya ban pynkiew tulop ïa ki Nonghikai SSA wat hadien 8 snem ruh, ka AMSSASTA-West Khasi Hills District kan pynlong noh da ka jingïalang ha ka 24-08-2024.
Ïa kane ka jingïalang paidbah yn pynlong ha ka por 10:30 mynstep hapoh Mount Hermon Higher Secondary School, Nongstoiñ (marshiliang wah bad ka Market Complex).
Ha ka kyrwoh khubor bala phah da u Babu BP Shangpliang, General Secretary ka AMSSASTA – West Khasi Hills u la ong, kane ka jingïakynduh jong ki para Nonghikai SSA ka West & Eastern West Khasi Hills District kan ïatai beit tang halor ka mat ‘Enhancement’ bad ki jait jingïakhih ba khlaiñ ban pynlong ha ki sngi ban wan.
Shuh shuh u la ong ruh ba ka seng kan shim beit ïa ka rai jong ka sur ki Nonghikai SSA ha ka jingïalang, kumno yn leh.
U Bah Bubu Shangpliang u la ong ruh, “Ngi kynmaw kyndiang ba dei tang kane ka Sorkar ba mynta bad ka Sorkar ba la leit ki bym shym la kyntiew tulop shuh ïa ngi ki Nonghikai SSA, hynrei kiwei kiwei ki Sorkar watla kim lah ban regularize ïa ki Posts ki Nonghikai SSA kumba la ïai dawa na ka por sha ka por, hynrei kawei hadien kawei ka Sorkar ki ai ‘Enhancement’ haduh 100% man ka 2, 3 bad 4 snem (2008, 2010, 2013 & 2016) katkum ka jingïaid jong ka por namar ka dor ka mur jong ki mar ki mata ki ïai kiew ïai kylla.”
Namarkata, ka AMSSASTA-WKHD, lyngba ka kyrwoh khubor na utei u nongïalam u la ong ba ka seng jong ki Nonghikai SSA hapoh jong ka Jylla Meghalaya ka khot ka wer bad kyntu ïa ki hynmen-para Nonghikai SSA ban klet noh ka jingsngew seng ne sngew Association, hynrei ban wan ïapyrkhat lang na ka bynta ka bit ka bïang bad ka bha ka mïat jong ki nonghikai hapoh ka Jylla Meghalaya hi baroh kawei.
