Shillong, Nailar 22
Hadien 13 sngi ka jingshah kem jong ki nongïalam bad dkhot ka seng Hynñiewtrep National Youth Front(HNYF)ha ki bor pulit ha ka 26 tarik Naitung 2024, halor ka jingdonkti ban pynsangeh ïa ki kali kamai ‘Tourist’ kiba wan nabar ka Jylla ha ka jingkieng Umtyngar ban hiar sha ki jaka jngoh kai kiba don sharum ka thaiñ Sohra bad Dawki, kitei ki 10 ngut ki la lait jamin noh ha ka miet jong ka 14 tarik u Nailar, 2024.
Kum ban kdew hangne, na ka liang ka seng hapoh ka jingïalam u President ka HNYF East Khasi Hills District, u Bah Steve Raymond Khyriem ha ka step jong ka 26 tarik Naitung, ki la leit ban hiar kynsan sha ka jingkieng ha Umtyngar ban bat hi dalade ïa ki kali kamai ‘Tourist’ kiba wan nabar ka Jylla da ka jingkynnoh ba ka ka Sorkar Jylla kam pyntreikam satia ïa ka Meghalaya Residents Safety and Security Act (MRSSA) hapoh ka jylla bad ha kajuh ka por ba kum ka Sorkar kam lah ban wanrah ïa ki rukom treikam jong ki kam jngoh kai pyrthei ban khang lad ïa ki kali kamai ‘Tourist’ kiba wan nabar ka Jylla ban kamai sahuh hapoh kane ka Jylla kaba la ktah ïa ka kamai-kajih jong ki nongñiah kali kamai ‘Tourist’ kiba dei ki paradoh-parasnam.
Na ka liang U Nongsaiñ Hima haba ïoh ban ïakren bad u Bah Fernando Shangpliang uba dei u Muktiar jong ki 10 ngut ki nongïalam bad dkhot ka seng HNYF, u la ïathuh ba ïa ka ‘case’ jong kitei ki 10 ngut la pynrung hapoh ka thanat Mawngap da ka ‘Suo Moto Case’ ha katei kajuh hi ka sngi ka 26 tarik Naitung.
U la ïathuh ba ïa kitei ki 10 ngut la pynlong ka jingtohkit da ki pulit bad hadien kata la rah ïa ki sha ïingkashari bad na ka liang ka ïingkashari ka la phah set 14 sngi ha ‘Judicial Custody’.
U la ïathuh ba ki aiñ kiba kitei ki 10 ngut ki dkhot bad nongïalam ka HNYF ki la shah pynngat ki long ha ka Bharatiya Nyaya Sanghita, 2023 ha ka kyndon kaba 132, 136, 127, 196, 351, ha ka aiñ jong ka Meghalaya Maintenance Public Order (MMPO), Act ha ka kyndon kaba 8 bad ha ka aiñ jong ka Motor Vehicle Act pat ha ka kyndon kaba 201.
U Bah Shangpliang u la ong ba ha katei ka jingjia ka khlem don satia kano-kano ka jingïashoh ïadat ne ka jingkren tohmet ïano-ïano, bad na ka liang jong u kum u Muktiar un ïaid shakhmat ha kaba ïadei bad kane ban pynthikna ba ka ‘case’ pyrshah ïa kine ki 10 ngut kan khuid.
U la ïathuh ba ha ka sien kaba nyngkong u la ïaleh ban bah jamin ïa kitei ki 10 ngut hynrei na ka liang ka ïingkashari pat ka khlem ai satia bad ka la kyntait namar ka dang long kloi shaba palat bad ba ka jingtohkit ka dang ïaid shakhmat.
Nalorkata, u la ïathuh ba ka dei ha ka sien kaba ar jong une u bnai ba mynta ba na ka liang jong u, u lah ïoh ban pyllait jamin ïa ki hadien ba na ka liang ka ïingkashari ka la pynlong ïa ka jingbishar bad ka la rai ban ai jamin noh ïa ki ha ka 8 tarik u Nailar ha ryngkat bad ki kyndon, hynrei namar ka jingdon jong ki katto-katne kiba slem ban wanrah ïa ki kot ki sla kumta ka la shimpor ïa ki ban lait na patok ha kaba ki la lait noh ha ka 14 tarik Nailar.
“Ki kyndon ba la buh ïa ki ka long ba kim dei shuh ban leh kum kito ki kam bad ha kajuh ka por ki dei ban leit shapoh thanat lane hapoh ïingkashari ha kano-kano ka por ba na ka liang u nongtohkit ne ka ïingkashari ki phah wan ïa ki bad lada ki mih napoh ka Jylla ruh ki dei ban ïoh jingbit shwa na ka ïingkashari,” la ong u Bah Shangpliang.
Ki 10 ngut ki nongïalam bad dkhot ka seng kiba lah shah kem ki kynthup ïa u Steve Raymond Khyriem, Andrew Lyngdoh, Banrap Wanñiang, Franky Lyngdoh, Kitbor Myrthong, Manbhalang Sun, Orester Mawlong, Tyllibor Swer, Donbok Sohalong, Denis Malngiang.
