Shillong, Nailar 22
Ki pulit ka East Jaiñtia Hills ha ka step jong ka Sngi Palei ha ka por katba ki dang pynlong ïa ka jingtalasi ban khynra ïa ki mynder, ki la ïoh bat noh ïa uwei u briew ryngkat u drok ‘Heroin’ na kawei ka bos night super.
Ha u kyrwoh khubor ba la pyllait da u Superintendent of Police ka East Jaiñtia Hills, u Giri Prasad, la pyntip ba mynta ka step ha ka por kumba 4:00 baje eiei, ki pulit ka Ratacherra ryngkat bad ki nongtrei ka Umkiang PPP ha ka por ba la pynlong ïa ka jingtalasi kali ha Ratacherra ban khynra ïa ki mynder, kila ïoh ban pynsangeh ïa kawei ka bos (night super) kaba don ïa u nombor AS12-E-6399 kaba wan na Silchar ha Assam.
Hadien ba la pynsangeh bad haba la khynra ïa ka bos, ki pulit ki la ïoh ban kurup 7 tylli ki synduk sabon kiba la thep ïa u drok Heroin uba khia kumba 79.81 gram na uwei u briew ïa uba la tip kyrteng kum u Md Siraj Ali, 35 snem ka rta, uba na Forest Colony, Polo, Shillong.
Halor kane ka jingjia, na ka liang ki pulit ki la pynngat ïa utei u Md Siraj Ali hapoh ki kyndon jong ka Narcotic Drugs & Psychotropic Substances (NDPS) Act bad ka jingtohkit mynta ka dang ïaid shakhmat.
