Shillong, Nailar 22
Ki pulit ka tnat Enforcement jong ka Khasi Hills Autonomous District Council (KHADC) ha ka jingkhynra ïa ki dukan bar jylla ha ka thaiñ Khanapara, Ri-Bhoi, ki la ïoh ban khang noh ïa bun tylli ki dukan kiba la plie bad khaïi be-aiñ.
Ïa kane ka jingkhynra ba la ïalam da u Inspector in-charge ka Ri-Bhoi, u Bah F Kharsyntiew ba la pynlong ha ka Sngi Palei bad la leh kyndit ïa kaneban ïoh bat ïa ki dukan jong ki bar jylla kiba khaïi be-aiñ khlem da pynbiang ki kot ki sla.
Ha kane ka jingkhynra, ki pulit Enforcement ki la lap bun tylli ki dukan jong ki bar jylla kiba pynïaid shakhmat ïa ka kam khaïi khlem da biang ki kot ki sla bad ha kaba la khang tala syndon ïa ki.
Kane ka jingkhynra ba la pynlong kyndit-kyndit ka la long kaba seisoh bha ha kaba la ïoh ban bat ïa ki trai dukan kiba ju ïaleh ïarieh bad ki briew ka District Council haduh ba kila hap ban ïamih bad panmap na ki pulit Enforcement nalor ka jingkular ba kin sa pan noh mar mar ïa ka laisen khaïi (Trading Licence).
Kine ki bar jylla kila pan jingmut ruh na ki Enforcement halor ka kam ban pan ïa ka laisen bad hadien ka jingbatai kaba shai bha, ki Enforcement ki la ai shithi ïa kine ki bar jylla ba ki dei ban pynbiang ïa ki laisen hapoh ka 10 sngi lym kumta kin ym lah satia ban plie ïa ki dukan jong ki.
U Inspector in-charge u la bthah ïa ki nongkhaïi bar jylla ba kim dei ban ïarieh ne leh buit tuh haba wan khynra laisen ka KHADC hynrei ki dei ban wan shakhmat ban ïakren lada don kano kano ka jingeh khnang ba kin suk hi hadien habud.
Shuh shuh u la bthah ruh ïa kine ki trai dukan ba ki dei ban pynrung kyrteng ïa ki dukan jong ki sha Meghalaya namar ka thaiñ ka dei kaba mar syndah bad ka Assam-kaba ju mih bun ki jingïakajia pud.
