Shillong Nailar 22
Ka Dorbar Synrai jong ka Ïingdorbar Thawaiñ kan sdang ha ka Sngi Thohdieng hapdeng ka jingkylla ka saiñ hima ha kane ka Jylla ha kaba yn sakhi ïa ki ki lai ngut ki MLA ka Congress kiba ju shong ha ka liang pyrshah kin kynriah jaka shong noh sha ka liang synshar bad ka Congress kaba ju bat ïa ka kyrdan nongïalam ka Liang Pyrshah ka lah ban duh noh ïa kane ka kyrdan namar mynta ka don sang uwei u MLA ha Ïingdorbar.
Ïa ka kyrdan nongïalam ka Liang Pyrshah lah ban ïoh bat noh da ka Trinamool Congress (TMC) kaba don 5 ngut ki MLA ha Ïingdorbar Thawaiñ.
Ka jingkylli ka long, hato u Lamphang ka Ïingdorbar Thawaiñ un dang pynneh ïa u MLA ka Congress na Mylliem, u Bah Ronnie V Lyngdoh kum u nongïalam ka Liang Pyrshah ne un ai noh sha ka TMC, bad lada ai sha ka TMC, mano ban shimti kum u nongïalam ka Liang Pyrshah.
Kane ka dei ka jingkylli kaba yn sa ïoh jubab ha Ïingdorbar ha kane ka dorbar synrai ka ban sdang ha ka sngi Thohdieng (23 tarik Nailar) bad kan kut ha ka 30 tarik Nailar.
Ka TMC kaba don 5 ngut ki MLA ka don ruh u MLA uba la rim tam na baroh, kata, u Dr Mukul Sangma na Songsak konstitwensi bud sa u Bah Charles Pyngrope u MLA ka TMC na Nongthymmai konstitwensi.
U Dr Mukul u la long teng u Myntri Rangbah ka Jylla bad kumjuh ruh u la bat teng ïa ka kyrdan kum u nongïalam ka Liang Pyrshah ha Ïingdorbar Thawaiñ.
U Bah Charles Pyngrope ruh u dei uwei na ki MLA ba la kham rim bad kham shemphang ha Ïingdorbar namar u la bat teng ïa ka kyrdan kum u Lamphang ka Ïingdorbar Thawaiñ naduh u snem 2009 haduh 2013.
Ka Congress kaba don 5 ngut ki MLA ka don sa tang u Bah Ronnie marwei namar lai ngut ki la leit ïasoh bad ka NPP katba u Saleng A Sangma u MLA ka Congress na Gambegre konstitwensi u la iehnoh kam kum u MLA ha u Jylliew mynta u snem hadien ba u la shahjied kum u MP ka Tura.
Ka Dorbar Synrai kan long ha ki 5 sngi ba long trei ha kaba lai sngi la mang na ka bynta ban pyndep ïa ki kam ka Sorkar (government business) kiba dei ban pyndep ha Ïingdorbarkata ha ka 23 tarik, 28 tarik bad 30 tarik Nailar katba ar sngi la mang na ka bynta ki MLA ban wanrah ïa ki mat bapher bapher ha Ïingdorbar kata ha 27 tarik bad 29 tarik Nailar.
