Shillong, Nailar 22
Ki katto katne ngut ki MLA barim jong ka Congress ki bym kwah ban pynpaw kyrteng ki la pynsngew ba la dei ban ai da ka takma ksiar kumba leh ha ka Olympics ïa u MP barim bad President ka Congress ha Meghalaya, u Bah Vincent Pala, namar ha ka jinglong President jong u haduh 20 ngut ki MLA ki la mih na ka seng ryngkat ki phew ngut ki MDC bad da ki spah ngut ki nongtrei ba shitrhem.
Haba ïoh ban ïakren bad kitei ki MLA barim, ki la buh jingkylli balei ka All India Congress Committee (AICC) ka sngap jar haduh kine ki sngi wat lada bun ki MLA bad MDC ki la mih lut na ka seng hapoh ka jingïalam jong u BahPala kum u President.
Ki la kynnoh ruh ba ki ïoh khubor ba ka jinglong President jong u Bah Pala ka dei da kaba shu tah umphniang ïa ki kti jong ki nongkitkam ka AICC da ka jingïarap jong ki nongïalam ka NPP ban neh ha kane ka shuki President.
Shuh shuh ki la pynpaw ïa jinglyngngoh da kaba ong ba haba ki MLA ki leit kyrshan ïa ka MDA ha District Council, u Bah Pala u pynsait khuid ïa ki, hynrei mynta pat u sospon (suspend) ïa ki halor ka nongrim ba ki ïajan bad ka sorkar MDA.
Ki la kynnoh ruh ba lada ka jinglong President u Bah Pala ka dang bteng, ka seng Congress kan sa duh jait syndon ha Meghalaya namar kin sa phet uwei hadien uwei pat.
