Shillong, Nailar 22
Ka Employment Monitoring Cell jong ka Khasi Students’ Union (KSU) ka la pynpaw ba ka kwah ba na ka liang jong ki nongmihkhmat ka jylla kin ïatai ïathir sani halor ka mat kaba ïadei bad ka Meghalaya Public Service Commission (MPSC) na ka bynta ban lah ban saiñdur bad pynbeit ryntih ïa ka rukom thungkam thungjam.
Kane ka jingpynpaw bad jingkwah jong ka KSUka la long hadien ba na ka liang ka Employment Monitoring Cell ka KSU hapoh ka jingïalam jong u samla Rueben Najiar ka la leit aiti ïa ka dorkhas ha ka Sngi Palei sha kiba bun ki MLA ba kynthup ïa u MLA ka TMC na Nongthymmai u Bah Charles Pyngrope,bad ruh sha ki nongïalam saiñpyrthei kum u Bah Jemino Mawthoh na ka UDP, Bah Hamletson Dohling na ka NPP bad kiwei.
Ka jingleit ai ka KSU ïa kane ka dorkhas ka long ba ki MLA kin rah ïa ka mat kaba ïadei bad ka MPSC ban ïatai ïathir ha kane ka dorbar synrai ka jylla ka ban sdang naduh ka Sngi Thohdieng.
Lah ban kdew ba ka KSU ka la dep ban leit buh ïa kane ka dorkhas hakhmat u Myntri Rangbah u Conrad K Sangma halor ban wanrah ïa ka jingkylla ha ka rukom treikam jong ka MPSC kaba la jyrsieh ha ka rukom thungkam thungjam.
Haba kren sha ki lad pathai khubor mynta ka sngi, u samla Rueben, uba long u Chairman ka Employment Monitoring Cell ka KSU, u la ong, ka mat ba ïadei bad ka MPSC ka dei kaba ktah ïa ka jylla baroh kawei, namar la sakhi ba watla kum ki samla ki la pyndep ïa ki jingpule, bad watla ki ïoh ïa ki ‘Mark’ baheh ha ka eksamin, hynrei namar bym don jingithuh bad ki heh haiñ, ki duh noh ïa la ka hok.
U la ong, ka KSU ka la shim ïa kane ka sienjam ban pynbeit ïa ki kynrum kynram hapoh ka MPSC bad ha kaba la pynlong ruh ïa ka jingïakhih ha phyllaw ka shlem treikam jong ka Commission ha kine ki taïew ba la dep namar ka kwah ban don ka jingleh khuid ha ka thungkam thungjam.
Une u nongïalam ka KSU u la ong, lada ym lah pynkylla ïa ki aiñ ki kyndon jong ka MPSC, kumta kum kine ki jingjia bad kynrum kynram kin nangïai jia bad la sakhi ruh ba ka jinghiar jong ka Meghalaya ka dei namar ka jingbym lah ban sei ïa ki ophisar IAS ne kiwei kiwei ki ophisar kiba tbit.
U la ong, ka seng ka kwah ba ki MLA kin rah ïa kane ka mat jingdawa ban ïathir ban wan ha kajuh ka sur bad kam kwah ban ïohi ïa ka jingïapait liang, hynrei ban long kawei, namar lada ka sorkar ka kwah ban pynkylla bad wanrah ïa ka thungkam thungjam kaba khuid, ka donkam ban pynkylla ïa ki kyndon aiñ ha ka Commission.
Lah ban pynkynmaw ruh ba ha kane ka dorkhas, ka KSU ka la buh ïa ki 20 tylli ki mat jingdawa ban saiñdur bad pynbha ïa ka rukom treikam ha ka Meghalaya Public Service Commission.
