Shillong Nailar 22
Ka sur ka la sawa jam na ki nongkitkam bad nongtrei ka Congress na kylleng ba donkam ban weng noh na ka jingïatreilang bad ka NPP ha Khasi Hills Autonomous District Council (KHADC) bad ïa kane la bynshet ha ki nongïalam ka MPCC ban shong pyrkhat bad shim rai kloi.
Ki nongkitkam ka Congress na ki district bad ki block bapher bapher hapoh ka Shillong parliamentary konstitwensi ki la pynpaw ïa kane ha ka jingïalang kaba la long ha Congress Bhavan ha ka sngi Palei ha kaba la pynïaid da u President Bah Vincent H Pala ha ryngkat ka jingdonlang kiwei pat ki nongïalam.
Ka sur kaba kiba bun ki nongkren ki la pynsngew ka dei ruh ka jingbym pdiang ïa ka jingleit noh jong ki lai ngut ki MLA ka Congress sha ka NPP, ha kaba ki la pynpaw ba ka Congress kan nang ïoh mynsiem ban trei shitom ha ki konstitwensi jong kine ki lai ngut ki MLA kiba la iehnoh ïa ka seng kumjuh ruh ban nang pynkhlaiñ ha kiwei ki Block.
U Bah Pala u la ong ba ki nongkitkam bad nongtrei ka Congress ki la bynshet ha ki nongïalam ka seng ban shong pyrkhat bad shim ïa ka rai ha kaba ïadei bad ka jingweng noh na KHADC kaba lamkhmat da ka NPP.
Na ka liang u Bah PN Syiem uba dei u MDC ka Congress bad u Dy CEM ka KHADC, u la ong ba ka Congress ka leit ban don ha ka Executive Committee namarba ki don ki daw kiba donkam eh ïa ka jaitbynriew khamtam namar ha kato ka por ka la don ka jingthmu jong ka Sorkar pDeng ban wanrah noh ïa ka aiñ ha Parliament ban pynkylla ïa ka Sixth Schedule.
U la ong ba da ka jingdon jong ka Congress ha KHADC ki don shibun ki kam kiba la lah ban leh mynta la shisnem naduh ki aiñ kiba dei ban pynkhlaiñ ïa ki bor synshar bad kiwei kiwei ki bynta kiba dei ban long katkum ka riti ka dustur bad ka lariti.
U Bah Pala u la ong ba haba ka Congress ka dei kaba don bynta ban ai ïa ka Sixth Schedule kum ka stieh ban ïada ïa ki paid riewlum ka sngewdei ban don bynta ban ïoh khmih bniah ïa ki jngit ki jnat haba donkam ban pynkylla ïa ka Sixth Schedule namar ym dei ban shah ïa ka BJP ba kan leh katba ka sngewbit haba pynkylla ïa ka Sixth Schedule kaba don hapoh ka Riti Synshar.
Kumta u la ong ba ki nongïalam ka MPCC kin sa shong pyrkhat ïa kane bad shim lang ïa ka rai.
Ha kawei pat ka liang, u Bah Pala u la ong ba ki nongkitkam bad nongtrei ka Congress ki la pynpaw ruh ba ka Congress ka dei ban ïakhun hi marwei ïa ka ilekshon MDC ban sa wan bad ki paidbah ruh ki phai khmat sha ka seng ban ai jingkyrshan.
