Shillong Nailar 22
U nongïalam ka Congress ha Jylla bad u MP barim ka Shillong, u Bah Vincent H Pala, u la ther tyngeh ïa u nongïalam ka National People’s Party (NPP), u Bah Sniawbhalang Dhar, da kaba kynnoh ba u dei u nongaiktien jong ka Rashtriya Swayamsevak Sangh (RSS) bad ka Bharatiya Janata Party (BJP) ha kaba ki nongïalam ka NPP kim banse ban kren ïaroh ïa ka BJP namarba ka kynhun tohkit Central Bureau of Investigation (CBI) ka la ap ktem ïa ki bad ka la tip ïa ki kam bym dei kiba leh da ki briew kiba don ha ka saiñ pyrthei ha Meghalaya.
U Bah Pala u la kynthoh kumtei haba ki nongthoh khubor ki la buh jingkylli halor ka jingong jong u Bah Sniawbhalang ba ka Congress kan sa duh sa dam ha Meghalaya bad dei namarkata ka daw ba ma u ruh u phet lypa ha u snem 2017-2018 na ka Congress.
U Bah Sniawbhalang u la ai nuksa ruh ïa ka jingïasoh NPP jong ki lai ngut ki MLA ka Congress ha ka 19 tarik Nailar ha kaba ka Congress kan don sa tang uwei u MLA, kata, u Bah Ronnie V Lyngdoh u MLA ka Congress na Mylliem konstitwensi.
“Nga la long u MP bad nga tip ïa kata namar ki ju wan sha nga ban ïoh kylli bad ban syntiat. Baroh ki kot ki sla ki don ha miej jong ki (CBI). Ka por kan poi bad ngin sa ïohi uei uta u Sniawbhalang. Ka khana kan sa ïathuh mano uta u Pala bad mano uta u Sniawbhalang?”
U Bah Pala u la ong ba ka NPP ka don kajuh ka sur bad kajuh ka thong kumba don ka BJP, kata, ban pyntroiñ bad pynduh ïa ka Congress hangne, kumba kwah ka BJP ban nym don Congress ha ka ri baroh kawei.
“U Bah Sniawbhalang Dhar u dei u nongaiktien ka RSS. Ka RSS lane ka BJP kat shaba ki don, ka sur jong ki ka dei beit Congress Mukt. Kumta u Bah Sniawbhalang ruh u hap ban pynsawa ïa kata ka sur lym kumta kan nym long namar la tip lut ïa ki kam bym dei jong ki naduh u drok, dewïong bad kiwei kiwei kiba la leh da u Bah Sniawbhalang Dhar bad ka kompani,” la kynthoh u Bah Pala.
Kumta u la ong ba u Bah Sniawbhalang u la don ha ka jingpeitngor ka CBI, bad ka CBI ka la tip ïa ki kam bym dei kiba leh da ki briew kiba don ha ka saiñ pyrthei ha Meghalaya.
“Mynta ki hap ban kren ïa ka sur jong ka BJP lym.kumta ka BJP kan pynkut ïa ki, bad dei na kata ka daw ba ka sur jong u Bah Sniawbhalang ka dei 100 na ka 100 ka sur jong ka BJP bad RSS bad ki paidbah ka Meghalaya ki dei ban tip u dei uba kumno. Ka jingkren ka jong u hi ka la thad madan ïa u ba u dei uba la pyndonkam da ka BJP bad RSS,” la ther shuh shuh u Bah Pala.
Halor ka jingong u Bah Sniawbhalang ba ka NPP ka kloi ban pdiang ïa u Bah Pala ha kano ka por, u Bah Pala u la jubab da kaba ong, “Nga tharai u Pala u kham riewspah ban ïa ka NPP.”
