Shillong, Nailar 22
Ki nongïalam jong ka seng ki trai kali bad nongñiah kali kiba kit maw bad shyiap kiba don hapoh ka lama jong ka Local Truck Owners’ and Drivers’ Association, East Khasi Hills District, ha ka jingsynranlang jong u MLA ka Mawkynrew Constituency, u Bah Banteidor Lyngdoh ha ka Sngi Palei ki la leit ban ïakynduh ïa u Myntri Rangbah ka Jylla, u Conrad K. Sangma ban pynpaw ïa ka jingeh kaba khraw halor ka jingpyntreikam ka Sorkar Jylla lyngba ka tnad Forest ïa ka kyndon ‘The Meghalaya Mineral (Prevention of Illegal Mining Transportation and Storage) Rules, 2022’ bad ïa ka ‘Meghalaya Minor Mineral Concession Rules, 2016 (MMCR)’.
Haba kren sha ki lad pathai khubor ha Shillong Press Club mynta ka sngi hadien ka jingwan ïakynduh ïa u Myntri Rangbah, u President ka Association, u Bah Egenstar Kurkalang, u la ïathuh ba u Myntri Rangbah bad uba khmih ruh ïa ka tnad khlaw u la khot ïa ki nongïalam ka seng ban ïakren halor ka kam tih maw bad shyiap ha kaba u la kular ba yn ailad biang ban tih maw bad shyiap hynrei ki dei ban bud ïa ki kyndon kata ban ym pyntuid ïa ka khyndew sha ki wahbad ym dei ban tih lane pynjot ruh ïa ki surok ha ryngkat ka jingphikir ban pynneh pynsah ïa ka mariang.
Na ka liang jong ka Association ka la pynsngew hakhmat u Myntri Rangbah ba ka Sorkar ka dei ban kham pynjem ruh ïa ki kyndon namar kiba bun na ki briew kiba im kamai jakpoh da ka kam tih maw bad shyiap ki dei ki bym kotbor satia ban bud ïa kane ka aiñ.
“Na ka liang u Myntri Rangbah u la shimkhia dalade bad ai ka jingkular ïa ngi ba na ka liang ka Sorkar kan bishar ïa ki kyndon khnang ba yn lah ban weng ïa ki jingeh,” la ong u Bah Egenstar.
Shuh shuh u Bah Egenstar u la ong ba ka Association ka la ai jingmut ruh ïa u Myntri Rangbah ba na ka bynta kito kiba pyntrei khlem ki kor ki bor katkum ha kane ka juk kaba mynta ne ki nongtrei ki bym kot bor satia ba dei ban pyllait noh ïa ki na ka jingdonkam ban don ïa ka ‘Mining Lease’ ne ka ‘Quarry Permit’ ha kaba na ka liang u Myntri Rangbah u la kular ban bsut lang ïa kane ha ka kyndon jong ka MMMCR.
“U Myntri Rangbah u la kular ba un sa shimkhia katba lah ban bsut lang ha kano-kano ka bynta jong ka kyndon MMCR ba ïa ki nongtrei barit-baria ki bym don ïa ka kor ka baheh lane ki bym don bor ba kim donkam shuh ban leh ïa ka ‘Quarry Permit’ ne ka ‘Mining Lease’ ne yn shah ïa ki ban trei kumba ki ju trei tangba ym dei pat ban trei da kaba pyntuid ïa ka khyndew sha ki wahduid-wah-heh ne ban pynduh noh ïa ka tyllong um lane ïa kino-kino ki jingteinam kiba la buh da ki mynbarim,”la ong u Bah Egenstar.
Nalorkata, ka seng ka la ai jingmut ruh ïa u Myntri Rangbah ba ki kali kiba kit maw bad shyiap kiba kit na shong hapoh shnong ne na distrik hapoh distrik ne hapoh Shillong kim dei shuh ban dang donkam ban ai ïa ka ‘Transport Challan’ lait noh sa tang ïa kito kiba kit sha kiwei pat ki Jylla ne ki Ri.
