Shillong, Nailar 23
Ka Trinamool Congress (TMC) ka la phah ïa ka kyrteng jong ka Sadhiarani M. Sangma sha ki bor ba halor jong ka seng ban long ka kyrtong ha kane ka ilekshon shiteng samoi ban wan na Gambegre.
Ka Sadhiarani ka dei ruh ka kurim jong u Myntri barim ka Jylla, u Zenith Sangma.
“Hynnin ka sngi, ka Election Committee jong ka TMC ka la shong jingïalang ha ïingsah jong nga ha kaba u President, Bah Charles Pyngrope lem bad kiwei-kiwei ki dkhot jong ka komiti ki la shong bad ïakren ïa ka aplikeshon jong ka kyrtong ba don jingthmu ban aireng, ka Sadhiarani M. Sangma,” ong u nongïalam ka seng, Dr. Mukul Sangma haba kren sha ki lad pathai khubor ha ka Sngi Thohdieng.
U la ïathuh ruh ba da ka jingïamynjur lang jong baroh, ka komiti ka la rai ban phah ïa ka kyrteng jong ka Sadhiarani na bynta ka jingmynjur kaba khatduh na ki bor ba halor jong ka seng ban long ka kyrtong jong ka TMC ha ka ilekshon shiteng samoi ban wan ha Gambegre.
“Kumta ngin ap ïa ka jingmynjur na ka Chairperson tad haduh ban da pynbna ïa ka kyrteng jong ka kyrtong,” u la ong.
Haba kdew ba ka seng ka la ïaid shakhmat bad ki kam ban pynkhreh ïa ka ilekshon (shiteng samoi), u Dr. Sangma u la ong ba u la buddien ïa ki jinglong-jingman hapoh konstiwensi (Gambegre) bad kawei kaba la ktik ïa ka jingmut-jingpyrkhat jong u ka long ba la bthah ïa baroh ki tnad treikam ban phai khmat sha kane ka konstiwensi bad kane ka kynthup lang ïa u Myntri Rangbah ka Jylla.
Na ka liang jong u, u la pynpaw ka jingsngewlyngngoh halor ka jingïoh pdiang jong bun tylli ki longïing ïa ki tin sop ïing.
“La ïa kine ki tin la sam sha ki nongïoh jingmyntoi lyngba kano-kano ka skhim Sorkar, ne dei ba la shu thied ïa ki bad la sam beit da ka seng…kane ngin hap wad. Kumta baroh ki kam ki tyllun hapoh konstitwensi. Kane kam dei eiei hynrei ka jingrhah jong ka seng kaba don ha ka bor-NPP, ban peit ba ki jop ïa kane ka konstitwensi,” u la ong.
“Hynrei nga ong ïa phi, ki paidbah kin sa ai ka jubab kaba biang tam,” ong u Dr. Sangma.
Kumban shu kdew hangne, ka konstitwensi Gambegre ka la sah thylli namar ka jingieh noh kam jong u MLA ka Congress, u Saleng A. Sangma ha ka 10 tarik Jylliew mynta u snem hadien ba u la shah jied kum u MP ka Tura Parliamentary konstitwensi ha kane ka ilekshon ba la dep sha ka Lok Sabha.
Hynrei kumba ka long, ka Election Commission of India (ECI) kam pat pynbna ïa ka tarik na bynta ban pynlong ïa ka ilekshon shiteng samoi jong ka Gambegre.
Ïa kane ka ilekshon shiteng samoi hap ban pynlong hapoh 6 bnai bad kumta ka lah ban long ha kano-kano ka por mynta u snem.
Ka Sadhiarani kaba dei ruh ka MDC ka Dengnakpara konstitwensi ka la ïakhun ha ka ilekshon sha ka ïingdorbar thawaiñ ka Jylla ha u snem ba la dep na Gambegre konstitwensi pyrshah ïa u Saleng Sangma bad shah rem noh da 2,871 ‘vote’. U Saleng u la ïoh 11,252 ‘vote’ katba ka Sadhiarani ka la ïoh 8,381 ‘vote’. U kyrtong ka NPP, u Rakesh Sangma u la ïoh 7,628 ‘vote’.
