Shillong, Nailar 23

U Myntri Rangbah barim ka Jylla bad nongïalam ka Trinamool Congress (TMC), Dr. Mukul Sangma ha ka Sngi Thohdieng u la ong ba ka Sorkar ka dei ban pynshai halor ki jingkynnoh u President ka Meghalaya Pradesh Congress Committee (MPCC), Bah Vincent H. Pala bad dawa ruh da ka jingtohkit halor kane ka bynta.

“Mynta phin hap pynleit jingmut ïa ka jingkren u President ka MPCC…u la ong ba ka seng ha ka bor synshar, ka la don bynta ha ka jingtan ïa ki nongmihkhmat da kaba pyndonkam ïa ka pisa kaba ki la shah kynnoh,” ong u Dr. Sangma haba kren sha ki lad pathai khubor. Kumta na ka liang jong u, u la ong ba ki nongïalam ha ka bor synshar (ba mynta) ki dei ban pynshai halor kane bad ki paidbah kin hap ruh ban buh kylli la ka dei shisha ne em ba ki donkti ha kine ki kam ba bakla.

“Kane ka long kaei-kaei kaba sngewkhia na bynta ka Jylla bad ki nongshong shnong jong ka. Lada don ki daw ki ban hap ngeit ba la pyndonkam bakla ïa ka pisa be-aiñ, te naei kata ka pisa be-aiñ ka wan,” buh jingkylli u Dr. Sangma.

Haba kdew ba ki paidbah kin hap ban kylli halor katei ka bynta, u la ong ba ka Sorkar kan hap pynshai ïa kane bad kam lah ban shu sngap jar naba ka long ka jingkynnoh kaba hap ban shimkhia namar lada jia ba ki jingkynnoh ki long kiba shisha, kata “phi la sngewthuh kaba kumno ka lawei phin ïohi ha kine ki snem ban wan.”

“Nga don ki daw ban ngeit bad katkum ki jingtip ba nga ïoh lum…leit sha kano-kano ka bynta jong ka Shillong phin lap ïa ki kam be-aiñ kiba jia. Kumta namar kine ki jingkynnoh ki la mih – ka Sorkar bad ki nongïalam kin hap ban pynshai halor kane bad nga dawa da ka jingtohkit,” u la ong.

Shuh shuh u la bynrap ba ki don 3 tylli ki jingkynnoh – pisa be-aiñ ba wan na u drok, pisa be-aiñ ba wan na ka jingtih be-aiñ ïa u marpoh khyndew, bad ka jnigshim kabu ïa ki kam kontrak.

“Kumta lada kine ki 3 tylli ki jingkynnoh ki la wan, ka long kaba donkam ïa ka ïingdorbar ban ïakren halor kane,” la ong utei u nongïalam ka TMC.