Shillong, Nailar:
U Myntri Khynnah ka Sorkar Pdeng ba dei khmih ïa ka tnad Jal Shakti, Dr. Raj Bhushan Choudhary ha ka Sngi Balang u la khmih bniah ïa ki skhim bapher-bapher jong ka Sorkar Pdeng ba la pyntreikam ha Meghalaya ha ka jingwan jong u sha nongbah Shillong ha Secretariat.
U Bah C. Ymbon, Myntri ka tnad Water Resource, ka Sorkar Jylla u la ïadonlang ha kane ka jingïalang ryngkat kiwei-kiwei ki heh ophisar jong ka Sorkar.
Ki ophisar ba dei khmih ïa ka tnad ki la pyni ïa ki jingjop bad ki jingeh jong ki skhim pynroi bapher-bapher ka Sorkar Pdeng kum ka Jal Jeevan Mission, Pradhan Mantri Krishi Sinchayee Yojana, Samagra Shiksha Abhiyan, Swachh Bharat Mission bad ki skhim jong ka tnad ka koit ka khiah.
Ha ka jingai jingkren jong u, u Myntri u la pynpaw ka jingsngewhun jong ka jingïaid shaphrang ka jingpyntreikam ïa ki skhim ha Meghalaya bad u la ïaroh ïa ki tnad Sorkar Jylla na ka bynta ka jingtreikam jong ki.
U Myntri u la ïaroh ïa ka Jylla na ka bynta ka jingpyntreikam jong ka ïa ka Jal Jeevan Mission, da kaba ong, “Ka Meghalaya ka la leh ïa ka kam kaba khraw ha ka jingpyntreikam ïa ka Jal Jeevan Mission (JJM).” U la ai jingmut ban pynduna ïa ka jingkyrduh um ha ka por duna um, kynthup ka jingshna ïa ki jaka pynlang um.
U la tyrwa, “Ha ka jaka ban shaniah tang ha ki wahduid, phi lah ban shna ïa ki jaka pynlang um slap, pynkhuid ïa ka, bad pyndonkam ïa ka ha rukom ba seisoh.”
U la batai ba ka jingpynlang ïa ka um slap na ki jaka ba jur u slap kan long ka jingmyntoi ïa ki jaka ri-lum, kaba long ruh ka tyllong um ha ki por duna um.
U Myntri u la kren shaphang ka thong ba kongsan jong ka Sorkar ban pynbiang ka umdih kaba shngain sha man ka longïing – JalJeevan Mission.
“Ka long ka thong kaba khraw jong ka Sorkar India ban pynbiang ka umdih kaba shngaiñ sha man ka longïing,” u la ong.
U la ban jur ba ka jingpynpoi ïa ka um dih kaba khuid ym tangba ka long ka jingmyntoi ïa ka koit ka khiah hynrei ka ïarap ruh ha kiwei-kiwei ki kam.
U la kubur ba ki jingeh ha ka koit ka khiah kiba mih na ki jingpang ba ïabit bad u la ong ba ka Swachh Bharat Mission ka la ïarap ha ka jingkyntiew ïa ka jinglehkhuid katba dang ïaid ki snem. U Myntri u la ban jur ïa ka jingdonkam ban bteng ïa ka jingai jinghikai ha kaba ïadei bad ka jingpynjaboh ïa ka um bad ki mar bam.
U Dr. Raj Bhushan u la kren shaphang ki jingsngewkhia halor ka jingpynjaboh ïa ki wahduid bad u la ïaroh ïa ki sienjam ba la shim da ka Sorkar Jylla ha kane ka bynta. Halor ka jingkhlad ki kmie ba dang pun bad ka jingkhlad ki khyllung, u la ban jur halor ka jingkongsan ka pule-puthi bad ka jingkyntiew ïa ka jingnang-jingstad jong ki longkmie.
“Ka jingnang jingstad ka dei ka bynta ba kongsan na ka bynta ka jingpynduna ïa ka jingkhlad ki kmie ba dang pun bad ki khylllung,” u la ong.
U la ong ba ha ki jaka ba la kham kiew ka jingnang-jingstad jong ki longkmie, kine ki jait jingkhlad ki kham duna, kumta ka jingnang jingstad ka long kaba donkam ban pynduna ïa kine ki jait jingkhlad.
Shuh shuh u Myntri uba la wan sha ka Jylla na ka bynta saw sngi bad un leit ruh sha South West Khasi Hills lashai ka sngi bad peit bniah ïa ka jingpyntreikam ïa ki skhim jong ka Sorkar Pdeng ha katei ha distrik.
Ha kajuh ka por, un leit jngoh ruh ïa ki jaka ba dang pyntrei ïa ki projek ha katei ka distrik.
