Shillong, Nailar 23
U nongïalam ka Trinamool Congress (TMC), Dr. Mukul Sangma ha ka Sngi Thohdieng u la ong ba ka jingtan jong ka National People’s Party (NPP) ïa ki nongmihkhmat na kiwei pat ki seng saiñ pyrthei ka dei namar ka jingbym shaniah jong ka seng ha la ki jong ki dkhot.
U Dr. Sangma u la kren ïa kane haba jubab halor ka jingpynïasoh NPP ba dang shen jong ki 3 ngut ki MLA ka Congress ba kynthup ïa u Dr. Celestine Lyngdoh (Umsning), Bah Charles Marngar (Mawhati) bad Bah Gabriel Wahlang (Nongstoiñ).
“Kine ki jingpyrshang ki la ïaid bad kane kam dei ka sien kaba nyngkong. Shuwa ka ilekshon 2023, phi la ïohi katno ki thrang ban ïadon bynta ha ka ban tan ïa ki nongmihkhmat. Ha u 2018, phi la ïohi ruh ka jingjia jong u nongmihkhmat barim ka Ranikor, kumno u la ngat shrip ha kane ka kam – kaba bakla shibun.”
Haba kdew ba ka jingtan ïa ki nongmhikhmat na kiwei pat ki seng kam manbha na bynta ka Jylla, u Dr. Sangma u la ong ba hadien ka ilekshon 2023, la sakhi ïa ka jingpynïasoh ka PDF sha ka NPP.
“Kane ka pyni ruh ïa ka jinglong rhah jong ki ban neh ha ka bor…jia katba jia. Kumta kane kaba jia mynta ka ïasyriem. Kine ki kam kim manbha na bynta ka Jylla. Ka Jylla barabor kam ju sakhi ïa kum kane ka saiñ pyrthei hynrei lada ngi phai dien ïa kiei-kiei kiba la ïalam sha kane ka jinglong-jingman, ka long kaei-kaei kaba hap ban shimkhia na bynta ki nongshong shnong ka Jylla,” ong utei u nongïalam ka TMC.
Haba pynsngew ba kitei ki nongmihkhmat ki dei kiba la shah jied kum ki dkhot ka Congress, u la pynpaw ka jingartatien halor ka jingïatylli jong ki.
“Kane ka sienjam la shim namar ki ïalade kim ïatylli. Ma ki hi kim shaniah ïa la ki jong ki dkhot, nga kren da kaba shai,” kynthoh u Dr. Sangma ïa ka NPP.
La ka NPP ka pyrshang kynjoh ne em sha ki MLA ka TMC bad kumno un pynneh ïa la ki dkhot, u la ong, “Nga don ka jingshaniah ba pura bad ka jingkyrmen skhem ha la ki jong ki dkhot. Nga tharai ngi la pyni ruh ïa kane hashuwa. Phin hap sngewthuh ïa kawei ruh ka bynta…khlem ka jingthmu ban pynsngewsih ïano-ïano, hynrei ka long ruh kaba donkam ïa man ki seng ban pyntikna ba ki dkhot jong ki, ki neh bad pyndep la ka kamram.”
Ha kawei ka liang u la ong ba kaei kaba la jia, lehse ka lah ban dei na ka seng hi ha kaba ka lah ban don ka jingïakynad hapoh ïing la katto-katne por bad kaba la ïalam pat sha kane ka bynta – ki lah ruh ban don kiwei-kiwei ki daw.
“Kam dei ka kamram jong nga ban kylli na ki nongïalam ka Congress, hynrei nga don ka jingngeit naba nga ithuh ïa baroh na ki – ki long shi bynta jong ka kynhun jong nga ha ka por ba nga la don ha ka seng shuwa ban pynïasoh sha ka TMC,” u la ong.
Shuh shuh u la bynrap, “Phi dei ban sngewthuh hangne ïa ka jingïapher (hashuwa u 2023) haba ngi pynïasoh ha u 2021, ngi la pynïasoh sha ka seng thymmai da ka jingthmu ban ai da kawei pat ka rynsan saiñ pyrthei ym da ka jingthmu ban don ha ka bor hashuwa ka ilekshon. Kane ka jingïapher. Hynrei kine ki jingjia ki long ban ïadon bynta bad ka Sorkar, ka jingrhah ban don ha ka bor. Ngam sngewthuh balei ki MLA ki rhah ban don bynta bad ka bor synshar lymda don ki bynta kiba khring ïa ki.”
