Shillong, Nailar 23
U Working President ka Meghalaya Pradesh Congress Committee (MPCC), u Bah Pynshngaiñ N Syiem, uba dei ruh u Deputy Chief Executive Member ka Khasi Hills Autonomous District Council (KHADC) u la pynpaw ka jingsngew kynjah haba ki MLA bad ki MDC naka seng Congress kiba long kum ki hynmen bad para ki la mih noh ban leit pynïasoh sha kiwei ki seng saiñpyrthei.
Haba ïakren bad ki nongthoh khubor hadien ba la wai ka Dorbar kyrpang ha KHADC, u Bah Pynshngaiñ u la ïathuh ba ha ka jingïalang ka MPCC la ïatai bha halor ka jingïatreilang ki MDC bad ka NPP ha KHADC hynrei ïa kane la shaniah ha u President ka MPCC, u Bah Vincent Pala ban peit bniah.
U la batai ba ka jingïatreilang ki MDC ka Congress bad ka NPP ka long ban ai jingmut ha kiba bun ki liang khamtam ban pynkhlaiñ ba ka sorkar India kan pynkhlaiñ ïa ka Khyrnit kaba Hynriew.
Haba kylli kan ktah ne em ia ka Congress haba ïatreilang bad ka NPP ha ka ilekshon MDC, u la ong ba ki paidbah ki peit ïa u kyrtong uba trei bha ïa ka konstitwensi.
U la pynshai ba kam don ka jingdawa ban pynhiar shuki ïa u Bah Pala watla 12 ngut ki MLA ki la mih hapoh ka jingïalam u Dr. Mukul Sangma, san ngut ki la mih ha ka jingïalam Kong Ampareen Lyngdoh bad mynta laingut ki la mih ha ka jingïalam u Dr. Celestine Lyngdoh kynthup ïa ki MDC kiba la mih kham hashwa.
U la ong ba ka ilekshon MDC ka la jan bad kam dei shuh ka por ban pynkhyllem nongïalam, hynrei ban pynkhlaiñ ïa ka seng ha baroh ki liang.
U la pynpaw ba ma u, un nym phet seng shuh namar kam long shuh ban leh shongshit kum ha ki por mynshwa namar ki paidbah ki la stad mynta.
