Shillong Nailar 23
U Symbud Myntri Rangbah u Bah Sniawbhalang Dhar uba dei ruh u National General Secretary ka NPP u Bah Sniawbhalang Dhar pynphai ktien halor ki jingkynthoh ïa u da u President ka Congress u Bah Vincent H Pala ha kaba u la ong ba u Bah Pala u dei ban bishar shwa ïalade bad wad ïa ka daw balei ki MLA ka Congress ki phet noh ynda u la shimti kum u nongïalam ka Meghalaya Pradesh Congress Committee (MPCC).
Ha kajuh ka por u Bah Sniawbha u la kyntait ïa ki jingkynnoh ba u dei u nongaiktien ka BJP bad RSS tang namarba ka NPP ka ïatreilang bad ka BJP bad ka jingïatreilang ka Sorkar MDA ka dei na ka bynta ki kam pynroi ha ka Jylla.
U la ong ba ki jingkynnoh jong u Bah Pala ki long kiba bakla bad kam mut ba tang namarba iatreilang bad ka BJP, kiba don ha ka NPP kin dei ki nongaiktien ka BJP lane RSS. “Kane ka dei kaba bakla bad ka jingkynnoh ba khlem nongrim” ula ong.
U Bah Sniawbha u la ong ba u ju burom ïa u Bah Pala kum u MP barim bad kum u President ka MPCC hynrei um poi pyrkhat ba u nongialam kum ma u, un kren ïa kum kine ki jingkren khynnah.
“Ka longïing jong nga ka dei ka longïing kaba wan na ka jylli treikam lajong sha ka jylli saiñ pyrthei ym na ka kam saiñ pyrthei sha ka treikam lajong. Baroh ki tip ba ngi dei ka kompani kaba donbynta ha ki jingtei shna (construction), bad ka jingkynnoh bamsap u Bah Pala kaba mih na ki kam drok, ka dei kaba bakla palat,” u la pynshai.
Kumta u la ong ba u Bah Pala u dei ban pynshisha ïa ki jingkynnoh ba u leh ïa ki kam beaiñ naduh u drok bad kam bamsap ha kaba ki kot ki sla don bad la ap ktem da ka CBI.
“Ban ong ba ngi don hapoh ka jingpeit pyrman ka CBI, ngi tip ba kam don satia kaba kum kata. Sngewsih ba kum u MP barim un ong ba ngi donkti ha ki kam khaii drok, bad nga sngew ban ong ba kum ki nongialam ngi dei ban iasnohkti lang ban iakhun pyrshah ia u drok bad ratdyngkhong ïa une u jingdih. Hynrei ban kynnoh khlem nongrim ka long kaba bakla shibun,” la ong u Bah Sniawbha.
Haba kynthoh ïa u Bah Pala, u la ong ba u Bah Pala u dei ban shong bishar bha, namar haduh 12 ngut ki MLA ki la leit sha ka TMC tang mar ïa shimti ma u kum u President ka Congress ha Jylla.
“Hato yn kynnoh ia u Sniawbha ïa kane ruh? Haba wan sa ka ilekshon MLA ha u snem 2023, ka kong Ampareen, Kimfa bad Rapsang ki iasoh sha ka NPP. Hato phi mut ban ong ba dei manga ba khot ia ki sha ka NPP? Ban shu kynnoh ïa ka NPP namarba ki MLA ka Congress ki wan ïasoh ka dei ka bym ïahap satia. Ngi kum ka NPP ngi pdiang lut ia kiba wan ban ïasoh,” u la ong.
