Shillong Nailar 23
U MLA ka North Shillong konstitwensi u Bah Adelbert Nongrum u la pyneh triang bad u khlem treh ban weng ïa ka ‘Amendment Motion’ kaba u la wanrah ha Ïingdorbar Thawaiñ ha ka sngi ba sdang ka Dorbar Synrai ha ka Sngi Thohdieng na ka bynta ban pynbeit biang ïa ki sngi shong Dorbar namar ki sngi shong Dorbar tang san sngi ki lyngkot palat.
U Bah Adelbert u la pynsngew ha Ïingdorbar hadien ba u la phah jingthoh sha u Lamphang ka Ïingdorbar Thawaiñ halor ka jinglyngkot ki sngi shong Dorbar, ha kaba u la kyrpad ba dei ban pynjlan biang ïa ka Dorbar da ki sngi ym ban shu pynjlan tang da ki kynta ha kano kano ka sngi kaba donkam ban pynjlan.
Ha ka jingshisha, u Bah Adelbert u la ong ba wat lada donkam dei ban pynjlan ïa ka por shong dorbar haduh shiteng synñia.
Na ka liang u Symbud Myntri Rangbah uba peit ïa ka tnat Parliamentary Affairs u Bah Prestone Tynsong u la pynshai ba ka Business Advisory Committee jong ka Ïingdorbar Thawaiñ ka la shong ban buh sngi ha kaba lai sngi ka dei na ka bynta ban pynïaid ïa ki kam ka Sorkar katba ar sngi ban pynïaid ïa ki kam kiba ïadei bad ki mat kiba wanrah shimet da ki MLA ha Ïingdorbar Thawaiñ.
Hynrei u Bah Prestone u la ong ba ka BAC ka la dep kren bad mynjur lypa ba lada donkam ban pynjlan ïa ki kynta shong dorbar ha kano kano ka sngi hap ban pynjlan ha kaba ka bor ka shong ha ka bor kaba don ha u Lamphang.
Kumta u la ong ba lada donkam ban pynjlan ïa ka por shong Dorbar da ki bun kynta ruh hap ban pynjlan, bad lada donkam hap ban pynjlan ruh wat haduh shiteng synñia na ka bynta ban pyndep ïa ki kam hapoh Ïingdorbar Thawaiñ.
Na ka liang u Lamphang u Thomas A Sangma u la kren shai ba lada donkam ban pynjlan ïa ki kynta ha kano kano ka sngi shong Dorbar ma u un sa leh ïa kata.
Hynrei u la ong ba ban pynjlan ïa ki sngi shong Dorbar donkam ban shong jingïalang biang ka BAC ban pynbeit, hynrei lada shu pynjlan da ki kynta ka kam kan ïaid beit.
Kumta u Lamphang u la kylli na u Bah Adelbert la un weng noh ne em ïa ka amendment motion, hynrei u Bah Adelbert u la ong ba ai ba kane ka jingpynsngew jong u kan long kum ka jingsneng ïa ka Business Advisory Committee (BAC) jong ka Ïingdorbar Thawaiñ na ka bynta ban pynbeit bha ïa ki sngi shong Dorbar jong ka Ïingdorbar Thawaiñ ha ki por ban sa wan khnang ba ki sngi shong dorbar kin nym lyngkot palat.
Kumta u Bah Adelbert u la pyneh bad u khlem weng ïa ka Amendment Motion kaba u la wanrah.
Namarkata, u Lamphang u la buh ïa kane ka mat hakhmat ka Ïingdorbar la kan pdiang ïa ka Amendment Motion jong u Bah Adelbert ne em da kaba pynsawa sur, ha kaba ka sur kaba ong em ka la sawa jam, kaba mut ba ka ïing ka khlem pdiang ïa ka Amendment Motion jong u Bah Adelbert Nongrum.
Kaba phylla ka long tang u Bah Adelbert marwei u la pynsawa ïa ka sur jong u kaba kyrshan ïa ka Amendment Motion katba kiwei pat ki MLA ka Liang Pyrshah wat ki MLA ka VPP ki khlem pynsawa sur lang ban kyrshan ïa u Bah Adelbert.
Ka Dorbar Synrai ka Ïingdorbar Thawaiñ ka Jylla ka la sdang ha ka sngi Thohdieng bad kane ka Dorbar kan neh san sngi.
