Tura, Nailar 26
Ka jingsniew palat jong ka surok na Bajengdoba sha Borjhora ha North Garo Hills ka la pynlong ïa ki nongshong shnong ban bam por haduh 2 kynta ha ka jaka 40 minit ban leit ban wan.
Ha kaba ïadei bad kane, ka A’chik State Peoples’ Front (ASPF) ka la thoh sha u Myntri Rangbah, u Conrad K Sangma, ha ka Lah Sngi U Blei, ha kaba ki la kyntu ïa u ba un tuklar lem bad ban phah maramot noh ïa kane ka surok kaba la dap da ki thliew ki syar suda.
“Ka jingtlor jong ka surok ka wanrah jingeh ïa ki nongshong shnong. Mynshwa, ka ju shim por tang 40 minit ban leit ban wan, hynrei mynta pat, ka shimpor haduh 2 kynta namar ka jingdon ki thliew ki syar,” la ong ka ASPF ha ka shithi sha u Conrad da kaba bynrap ba ïa katei ka thaiñ la mihkhmat da u MLA na ka seng National People’s Party (NPP).
Shuh shuh ka ASPF ka la ong ba katei ka surok ka long kum u budlum na ka bynta ki nongshong shnong khamtam ha ka liang ka khaïi ka pateng.
La ong ruh ba katei ka surok ka pynïasoh ïa ka National Highway-51 Bajengdoba sha Rongsai AMPT Road lyngba ka Borjhora. Ka Rongsai, kaba don ha khappud Meghalaya-Assam, ka dei ruh ka jaka kaba ki kam khaïi pateng ki ïaid bha.
