Shillong, Nailar 26 (UNI)
Ka tnad shipai Border Security Force (BSF) ka la kyntait ïa ki jingkynnoh halor ka jingpynïap u nongïalam ba rangbah ka Bangladesh Chhatra League (BCL), ka seng samla jong ka Awami League, ka seng saiñpyrthei ka Myntri Rangbahduh barim ka Bangladesh, ka Sheikh Hasina, ha ki bynta jong ka Meghalaya, India.
Ki lad pathai khubor ka Bangladesh ki la ong ba u Ishaque Ali Khan Panna, u General Secre-tary barim ka BCL, u la shah pynïap ha ki BSF ha ka jingïasiat katba u dang thmu ban jam sha India.
Katba kiwei pat ki khubor ki kdew ba u la khlad namar ka jingsangeh tied u klongsnam katba u dang pyrshang phet na Bangladesh sha India bad u lah ban khlad ha ka por ba u dang kiew ïa ki lum. Kiba bun na kine ki khubor ki ki la thoh ba ïakren bad ki tyllong khubor.
“Ka dei kaba thok bad ka bym shisha ba u nongtrei ka Awami League jong ka Bangladesh la lap ba u la ïap hapoh India ha ki bynta jong ka Meghalaya. Ïa ka met ïap la lap ha Donna Cherra shapoh Bangladesh. Ka met ka la don ha katei ka jaka la 5-6 kynta hashuwa ba ki bor ba dei khmih ka Bangladesh ki la wan shim noh ïa ka,” la ong u Inspector General (IG) ka BSF, Meghalaya Frontier, u Harbax Singh Dhillon ïa ka UNI.
Ka thaiñ Donna Cherra ka hap hapoh thanad jong ki pulit Kanaighat jong ka Sylhet distrik, Bangladesh.
Ki tyllong khubor na ki bor syntiat ki ong, u Panna bad u Shamsuddin Choudhury Manik, u nongbishar ba la shongthait ka Appellate Division jong ka Bangladesh Supreme Court, ki la pyrshang ban phet lang sha India.
“Katba ïa u nongbishar ba la shongthait, u Justice Manik, la kem noh da ka Border Guard Bangladesh (BGB) hadien ba la suba ba u la shah shet ha u nongïarap na Bangladesh, Saddam, uba ha kawei ka liang u la shah bom shnong,” la ong ki tyllong khubor.
Ki tyllong khubor ki ïathuh ruh ba u Manik u la siew bun bah ka pisa sha u Saddam ban ïarap ïa u ban jam sha India lyngba ka Meghalaya.
“Ngim tip balei u Saddam u la shet kylla ïa u Manik da kaba aiti noh ïa u sha ka BGB wat hadien ba la siew bun bah ka pisa sha u,” la ong ki tyllong khubor.
U Panna bad u Manik ki la phet rieh namar ka don jingma ïa ka jingim jong ki naba ki dkhot ka Jamaat-e-Islami jong ka Bangladesh ki la pynïap naphang ïa ki nongtrei ka Awami League ne ñiat ïa ki sha along.
U Panna u dei ruh u Chairman ka Diamond Life Insurance Company Limited ha Bangladesh.
Ki shipai BSF ki la pynkhlaiñ ïa ki bor pahara ha shi lynter ka 443 km khappud hapdeng ka Meghalaya bad Bangladesh naduh ba sdang ki kynrum-kynram saiñ pyrthei ha kane ka ri ba marjan.
Na ka liang ka Sorkar Meghalaya ka la dep pynjari da ka korphiw miet ha shi lynter khappud bad ka Bangladesh.
