Shillong, Nailar 26
Ka khubor ba la ïohlum na ki pulit ka jylla ha ka Lah Sngi U Blei ka ïathuh ba ka Assistant Director ka tnat Tourism ka sorkar jylla ka la ujor ba ha ka step jong ka 23 tarik Nailar, uwei na ki nongtrei ha kane ka tnat u la lap ba kawei ka Laptop, kawei ka CCTV bad ka pisa ki la jah na ka shlem treikam jong kane ka tnat kaba don ha Lower Lachumiere, Shillong.
Ha kawei pat ka khubor, u Wankit Kupar Shylla u la ujor ba ha ka 25 tarik Naitung, u la ïoh jingtip ba ki runar ki bym lah ban ithuh ki la tuh ïa uwei u Remote Radio Unit (RRU) na ka jaka ba buh ïa u Mobile Tower ha Lapalang, Shillong.
Nalorkata, ki pulit ki la ïathuh ba u Roshan Kumar u la ujor ba ha ka 23 tarik Nailar, ki runar ki bym lah ban tip ki la tuh ïa ka thuk-thuk jong u (ML-05AC-7582) na Nongmensong Dongkadiang, Shillong.
Shuh shuh ki pulit ki la pyntip ba u Bhurba Lok Thapa u la ujor ba ha ka 23 tarik Nailar, ki runar ki bym lah ban ithuh ki la tuh ïa ka synduk kaba don pisa T. 5,000 bad kiwei ki tiar ki tar na Mahakali Mandir, Mawbah, Shillong.
Ha kawei pat ka jingjia, u MS ka Civil Hospital, Williamnagar, East Garo Hills, u la ujor ba ha ka miet jong ka 19 bad 20 tarik Nailar, ki runar ki la tuh ïa u Battery jong ka Generator na ka Hospital.
