Shillong, Nailar 26
U Snehankar Chakraborty lem bad ar ngut ki paralok jong u, ki la sdang ïa ka jingïaid lynti da ka ‘Cycle’ ha ka 22 tarik Nailar, 2024 na Guwahati sha Sohra ban pynsngewthuh ïa ka jingdonkam ki lad ai jingïada ïa ki nongthoh khubor.
Ha ryngkat u Chakraborty, uba dei u nongthoh khubor (Freelance Journalist) na Guwahati, Assam la don lang sa ar ngut kiwei ha kane ka jingïaid lynti bad kita ki long u Santanu Moram uba dei u samla pule bad u Rambabu Thakur uba ieit ïa ka jingñiah ‘Cycle’.
Haba kren sha ki lad pathai khubor ha ka Lah Sngi U Blei ha Shillong Press Club, u Chakraborty u la ong ba ka long kaba donkam bha ban pynsawa ïa ka sur jong ki nongthoh khubor ha kaba ïadei bad ka jingdonkam ban pynbiang ïa ki lad jingïada bad kum ka bai bam tymmen (Pension) bad ka Life Insurance.
U la kdew ba ki don palat 3,000 ngut ki nongthoh khubor kiba la shah pynïap ha kylleng ka pyrthei katkum ka jingbuh jingkheiñ ha u snem 2020.
Katkum ka jingong jong u, 99 na ka 100 ki nongthoh khubor ki la shah pynïap, hynrei ki bym shym la ïoh ïa ka jingithuh na ka bynta ka kam kaba ki la leh.
Ha kajuh ka por, u la kyrpad ruh ïa ki kynhun bapher bapher ban ïatreilang na ka bynta ban shim ïa ki lad ki lynti ban ïada ïa ka mei mariang na ka bynta ka jingmyntoi jong ki pateng ki ban sa wan.
