Jerusalem, Nailar 26 (UNI)
Ka tnat DefenCe jong ka Israel ha ka Lah Sngi U Blei ka la ïathuh ba naduh ba ka la sdang ïa ka jingleit hiar thma ïa ka Gaza, ka Israel ka la thied palat 50,000 ton ki tiar ïakhun, kuli bad kiwei.
“Kine ki tiar ki kynthup ïa ki kali, kuli, jingïada ïa ki bor pahara bad ki dawai dashin,” la ong katei ka tnat.
La ong ruh ba kitei ki tiar ki tar ki la long ki bakongsan na ka bynta ki shipai Israel ban ïakhun ïa kane ka thma kaba dang ïaid haduh mynta ha Gaza Strip bad pyrshah ïa ka Hezbollah ha khappud Israel-Lebanon.
Hynrei katei ka tnat ka khlem batai bnai na kiei ki Ri ka la thied ïa kitei ki tiar ki tar, watla ki heh sorkar jong ka Israel kham mynshwa ki la ong ba kham bun ki tiar thma la thied na United States bad na ki Ri ha dewbah Europe.
Lah ban kdew ba ka Israel ka la sdang ïa ka thma pyrshah ïa ka Hamas ha Gaza Strip ban pynhiar kput hadien ba ka Hamas ka la thombor ha ka 7 tarik Risaw, 2023 ha kaba 1,200 ngut ki briew ki la ïap bad kumba 250 ngut kiwei pat ki la shah rahbor.
Haduh mynta, ka jingïap briew na ka jinghiar thma ka Israel ïa ka Gaza Strip ka la long kumba 40,400, la ong ka tnat ka koit ka khiah ha Gaza.
