Shillong, Nailar 26
Ka Harijan Panchayat Committee (HPC) ha ka Lah Sngi U Blei ka la kyrpad ïa ka sorkar jylla ba kan pynjlan biang ïa ka por na ka bynta ban ai jubab ha kaba ïadei bad ka saiñdur ne ka ‘Blueprint’ ban pynkynriah ïa ki 342 tylli ki longïing na Them Ïew Mawlong (Them Metor).
Lah ban kdew ba ka jingai por ba 15 sngi jong ka sorkar jylla ïa ka HPC ka la kut mynta ka sngi, bad dei halor kane ba na ka liang ka Committee jong ki Harijan ka la kyrpad ban pynjlan ïa ka por.
Katkum ka kyrwoh khubor u Secretary ka HPC u Gurjit Singh, u la ong, hadien ka jingïalang kaba dang shu dep, na ka liang u Symbud Myntri Rangbah ka jylla u la ai jingmut ïa ka Committee ba ka dei ban ai ïa ka jubab hapoh ar taïew. Hynrei ka HPC kala pynpaw ba ka jingai por ka la lyngkot palat ïa ki namar ba kin hap ban ïasyllok bad ki bor bahalor jong ki Sikh.
“Ngi thmu ban ïasyllok bad u Jathedar jong ka Sri Akal Takht Sahib, ka Shiromani Gurdwara Prabandhak Committee ha Amritsar, ka Delhi Sikh Gurdwara Management Committee bad kiwei kiwei ki nongïalam. Ka jingbtin lynti ka jong ki, ka long ka bakongsan bha,” la ong u Singh.
“Namar ka jingbym ïoh ïa ka por, ki nongïalam ka jingngeit Sikhism ki la pynpaw ba kin ym ïoh por ban ïasyllok eiei ha kine ki ar ne lai taïew ban wan”.
Ka shithi ka la kdew ruh ba namar kitei ki daw, ka Harijan Panchayat Committee ka la kyrpad ba ïa ka jingïalang ban wan halor katei ka mat dei ban pynlong ha ka taïew bakhatduh jong u Nailur. Ka Committee ka khmih ruh ba ha katei ka por, kin lah ban ai ïa ka jingpynsngew ka jong ki ka ban long kaba ryntih lang na ka imlang sahlang baroh.
