Shillong, Nailar 27
U Symbud Myntri Rangbah ka Jylla u Bah Prestone Tynsong uba khmih ïa ka tnat District Council Affairs (DCA) u la ong ba ka Sorkar ka la dep ban ïoh ïa baroh ar tylli ki Amendment Bill ba la mynjur da ka Khasi Hills Autonomous District Council bad ka Jaiñtia Hills Autonomous District Council bad shen kan sa phah noh sha u Lat ka Jylla ban ïoh ïa ka muhor na u.
Haba kren sha ki lad pathai khubor ha ka Sngi Ba-ar, u Bah Prestone u la ong ba na ka liang ka Sorkar Jylla kan sa pynbna noh ïa ka jingpynlong ïa ka ilekshon sha ki artylli ki District Council tad ynda la dep ban ïoh ïa ka muhor na u Lat ïa ki Amendment Bill halor ka jingpynbeit thymmai ïa ki konstitwensi kiba hap hapoh ka KHADC bad JHADC.
“Ka tnat DCA ka la dep ban ïoh pdiang ïa baroh ar tylli ki Amendment Bill ïa kiba la dep ban mynjur da ka KHADC bad ka JHADC halor ka jingpynbeit thymmai ïa ki konstitwensi bad hadien ba na ka liang jong ka tnat ngi la dep ban peit bad bishar bniah, ngin sa phah pat ïa kine ki Bill sha u Lat ka Jylla ban ai ïa ka jingmynjur ka jong u,” la ong u Bah Prestone.
U la pyntip ruh ba ynda la dep ban ïoh ka muhor jong u Lat, na ka liang ka Sorkar Jylla kan sa shong pat ban shim ïa ka rai ban pynlong pat ïa ka ilekshon MDC ha baroh ar tylli ki District Council.
Lah ban pynkynmaw ba ïa ka samoi treikam jong ki MDC ha KHADC bad JHADC la pynjlan da 6 bnai bad kane kan kut noh ha ka 5 tarik Nailur, 2024, namar ka jingpynbeit thymmai ïa ki konstitwensi.
Watla dang ha kine ki taïew ka la don ka jingmih khubor ba nalor kane ka hynriew bnai, ka Sorkar ka lah ban pynjlan biang sa hynriew bnai ïa ka samoi treikam ki MDC kaba ym pat lah ban pynthikna satia hynrei lyngba ka jingmynjur da ki ar tylli ki District Council ïa ki Amendment Bill bad ban ap sa tang ka muhor na u Lat, la antad ba kan nym slem shuh ka ilekshon MDC.
