Shillong, Nailar 27
U MLA ka Congress na Mylliem, u Bah Ronnie V Lyngdoh, u la hiar noh na ka shuki kum u Nongïalam ka Liang Pyrshah ha Ïingdorbar Thawaiñ ha ka Sngi Ba-Ar.
Ka jinghiar shuki jong u Bah Ronnie ka long hadien ba u la shah ieh marwei ha ki lai ngut ki MLA ka Congress kiba la leit ban pynïasoh noh sha ka National People’s Party (NPP) ha ka taïew ba la lah, bad hadien ba u Saleng A Sangma u la hap ban hiar shuki kum u MLA ka Gambegre mar ïa jop kum u MP ka Tura.
Na ka liang ka Assembly Secretariat ka la pynmih ïa ka jingpynbna halor ka jinghiar shuki jong u Bah Ronnie bad la pyntip ba u Lamphang ka Ïingdorbar Thawaiñ, u Thomas A Sangma, u la pdiang ïa kane ka shithi iehnoh kam.
Lah ban pynkynmaw ba u Bah Ronnie u la shah thung kum u Nongïalam ka Liang Pyrshah ha u bnai Jylliew jong u snem ba la lah.
Watla ki seng kiba don ha ka liang pyrshah kum ka Congress, TMC bad VPP ki khlem don palat hynriew ngut ki MLA ban ïoh ïa ka shuki Nongïalam ka Liang Pyrshah, hynrei na ka liang u Lamphang u la pyndonkam ïa la ka jong ka iktiar ban thung ïa u Bah Ronnie.
Kumba ka long mynta, ka TMC ka dei kaba bun paid tam ha ka liang pyrshah bad ka don san ngut ki MLA. Lada u Lamphang u pyndonkam ïa ka iktiar kumba u la pyndonkam ban thung ïa u Bah Ronnie, katei ka shuki ba ju bat da u MLA ka Mylliem ka lah ban leit noh sha uwei na ki MLA ka TMC.
Haduh mynta, ki kyrteng kiba paw na ka TMC ban shimti ïa ka shuki Nongïalam ka Liang Pyrshah ki kynthup ïa u Dr Mukul Sangma bad u Bah Charles Pyngrope, la ïathuh ki tyllong khubor ba la ïohlum mynta ka sngi.
