Shillong, Nailar 27
Ka aiñ rew jong u MLA ka VPP na North-Shillong, Bah Adelbert Nongrum kaba la tip kum ka Meghalaya Reservation for Non-Creamy Layer of Schedule Tribes (in State Reservation Policy) Bill, 2024 ka la shah kyntait noh hapoh Ïingdorbar Thawaiñ ha ka Sngi Ba-ar lyngba ka jingrah sur ne ‘Voice-Vote’.
Haba poi sha ka bynta ban ‘vote’ halor katei ka aiñ rew, ka sur ba sawa jam kaba la mih hapoh Ïingdorbar ka long ’em’ bad kumta, u Symbud Lamphang, u Timothy D. Shira u la pynbna ba ka ïing ka la kyntait noh ïa katei ka aiñ rew.
U Bah Nongrum, haba wanrah ïa katei ka aiñ rew u la ong ba katkum ka Meghalaya Socio Economic Review, 2020 ba la pynmih da ka Sorkar Jylla, ka jingdon jong ka ki Schedule Tribe (ST) hapoh ka Jylla ka long 86% bad ka jingdon jong ki briew ha ki nongkyndong ka long 80% katba ka jingdon jong ki nongtrei bylla (Main and Marginal Workers) ka long 40%.
“Katkum ka kaiphod ba la pynkhreh da ka Institute of Human Development ka Sorkar Jylla jong u snem 2023, 32% na ka jingbun briew ha ka Jylla ka don hapoh u laiñ jingkyrduh,” ong u MLA.
Ka Article 16 (4) jong ka Riti Synshar ka ri ka shah ïa ka Jylla ban wanrah ki kyndon na bynta ban bhah ha ka thung kam thung jam la ka long ïa kano-kano ka ‘Backward Class’, ïa kaba ha ka jingsngew jong ka Jylla, ka bym da ïoh bynta than eh ha ki kam hapoh ka Jylla, u la ong.
U la ong ruh ba ka Article 15 (5) ka shah ïa ka Jylla ban wanrah ïa ki kyndon ba kyrpang lyngba ka aiñ na bynta ban kyntiew ïa kano-kano ka kynhun kaba sahdien ha ka imlang-sahlang bad pule-puthi jong ki nongshong shnong na bynta ban ïoh rung ha ki shlem jingpule.
“Hashuwa jong une u bnai, ka ‘Constitutional Bench’ jong 7 ngut ki nongbishar ka ïingbishar ba hakhlieh duh ka ri ha ka jingbun paid kaba 6:1 ka la pynneh ïa ka ‘Constitutional Validity’ jong ka aiñ kaba la thaw da ka Jylla Punjab kaba pynbiang ïa ka ‘Sub-Classification’ hapoh ka thup Schedule Caste (SC) bad ai ka rai ba ki Jylla ki don ka bor ban thaw ïa ki ‘Sub-Classification’ hapoh ka thup SC bad ST na bynta ban pynbiang ïa ka bhah,” u la ong.
Kumta ha ka Jylla, da ka jingmut ban khmih bniah ïa ka jingïapher ha ka ïoh ka kot hapoh jong ka thup ST bad ban ai ka kabu ha ka thung kam thung jam bad ka pule-puthi ha ka rukom kaba paka, donkam ïa ka aiñ kaba biang bynta ka bha ka miat jong kito ki nongshong shnong ka Jylla kiba duh jingmyntoi, u la ong.
Haba kdew ba la bun-bun snem, barabor dei ki bynta ba bit ba biang jong ka imlang-sahlang kiba ïoh myntoi lyngba ka bhah, u Bah Nongrum u la ong, “Kumta nga kyrpad ban wanrah ïa ka Private Members’ Bill ba la tip kum ka Meghalaya Reservation for Non-Creamy Layer of Schedule Tribes (in State Reservation Policy) Bill, 2024 ka ban pyntikna ïa ka bhah ka bym duna ïa ka 50% na bynta ka ‘Non-Creamy Layer’ jong ki ST ka Jylla pyrshah ïa kano-kano ka ‘Quota’ jong ka jingdon ki kam ba thylli ba la bhah na bynta ki ST haba pyntreikam ïa ka State Reservation Policy.”
“Ngi hap sngewthuh ba kito kiba bit ba bang ha ka imlang-sahlang ki kynthup tang kumba 10% (ha ka imlang-sahlang), hynrei ki bat kumba 90% ki kabu haba phai sha ki kam Sorkar bad ‘Quota Seat’ na bynta ki jingpule ba shajrong. Ka ‘Non-Creamy Layer’ ka kynthup ïa 90% jong ka imlang-sahlang katba ki lad ki kabu ïa ki, ki long markhongpong. Kane ka dei ban kylla bad hap pynbeit,” ong utei u nongmihkhmat ka VPP.
Shuh shuh u la bynrap ba hap ban sngewthuh ba dei ka ‘Non-Creamy Layer’ kaba bun paid bad kaba ‘vote’ ïa ki nongmihkhmat ban shah jied sha ka Ïingdorbar.
“Kumta ka long kaba donkam ba ngin shim ïa ki sienjam haba ïadei bad ka hok na bynta kiba duna ha ka ïoh ka kot lyngba ka aiñ kaba biang,” u la ong.
