Shillong, Nailar 27
U Symbud Myntri Rangbah ka Jylla, Bah Prestone Tynsong ha ka Sngi Ba-ar u la ong ka Sorkar ka la shimkhia ban khmih ïa ki jingtynjuh jong ka jingkylla suiñ bneng lyngba ki saiñdur mat treikam bad ki sienjam bapher-bapher.
“Ka Sorkar Jylla ka la pyni ïa ka jingminot ban shimkhia ïa ki jingtynjuh jong ka jingkylla suiñ bneng lyngba ki saiñdur mat treikam ba kyllum lang, ki buit thymmai bad kiwei-kiwei ki sienjam,” ong u Bah Tynsong haba jubab halor ka ‘Short Duration’ kaba la wanrah da u MLA ka VPP na Nongkrem, Bah Ardent M. Basaïawmoit hapoh ïingdorbar haba ïadei bad ka jingkiew ka jingshit bad ka jingkhluit khamtam ha Ri-lum Khasi-Jaiñtia.
U la ong ruh ba da kaba pynbeit ryntih ïa ki buit treikam bad ki thong jong ka ri bad pyrthei kumjuh ha ka liang ka jingkylla suiñ bneng, ka Jylla ka la jam shaphrang ban kyntiew ïa ka jinglah ban shah kumjuh ban pyntikna ïa ka roi ka par kaba neh.
“Katba ka jingkylla suiñ bneng ka bteng ban ktah ïa ka thaiñ, ki sienjam ka jingmanbha jong ka Jylla ki long ka ‘Model’ na bynta kiwei pat ki Jylla bad ki thaiñ kiba mad ïa kijuh ki jingtynjuh,” u la ong.
Haba kdew ba ka Jylla ka la ïohi lypa ïa ki jingkylla suiñ bneng ba kynthup ïa ka jingkiew ha ka shit bad ka jingkylla ha ka rukom hap slap, u Symbud Myntri Rangbah u la ong ba jingwad bniah da ka Water & Climate Lab IIT, Gandhinagar, ka kdew ba ka jingshit jong ka Jylla ha ka shi snem ka la kiew da 1° hapdeng u 1981 bad 2021 bad kane ka lah ban kiew sa da 1° hapoh u 2040.
“Da kaba buh jingmut ïa kine ki jingeh, ka Sorkar Jylla ka la shim ïa ki sienjam jong ka jingmanbha ban kyntiew ïa ka jinglah shah jong ka Jylla ïa ka jingkylla suiñ bneng bad ban pyntikna ïa ka roi ka par kaba neh. Kine ki kynthup ïa ki saiñdur mat treikam ba kyllum lang, ki rukom mang bad kiwei-kiwei ki sienjam – baroh ha ryngkat ki jingthmu ban pynduna ïa ka jingktah na ka jingkylla suiñ bneng,” ong u Bah Tynsong.
U la ong ruh ba ka Meghalaya State Action Plan halor ka jingkylla suiñ bneng ka long ka bynta ba kongsan jong ka buit treikam ka Jylla haba phai sha kane ka bynta.
“Kane ka mat treikam ka ïa beit ryntih bad ka National Action Plan halor ka jingkylla suiñ bneng bad ka pynleit jingmut ha ka ban pynïasoh lang ïa ka jinglah shah ïa ka jingkylla suiñ bneng haba ïadei bad ki ‘agenda’ ka roi ka par jong ka Jylla,” u la ong.
Na ka liang ka Sorkar ka la wanrah ruh ïa ka ‘Climate Action Budget’ kum shi bynta jong ka Mang Tyngka ka Jylla (2022-23). Ïa ka ‘Climate Action Budget’ la pynwandur ban pyntikna ïa ka jingpyndonkam hok ïa ka pisa paidbah ban khmih ïa ki jingtynjuh kiba mih na ka jingkylla suiñ bneng, ong u Bah Tynsong.
Ka Mang Tyngka na bynta u snem mang tyngka 2024-25 hapoh jong ka ‘Climate Action Budget’ ka long ?4501 klur, ?3181 klur la mang na bynta ki kam bapher-bapher ha 12 tylli ki tnad treikam bad ?1320 klur la buh bynta na bynta ki sienjam ban pynduna ïa ki jingma na ki jinglyngshop ha ki 7 tylli ki tnad treikam.
U Symbud Myntri Rangbah u la ong ruh ba ka Jylla ka la seisoh ha ka ban ïoh pdiang ïa ka jingïarap pisa na bynta ki projek heh bapher-bapher (External Aided Projects – EAP) bad ka la pyntikna ba kumba 50% jong ka jingpynlut na ki EAP ka leit sha ka ban pynïaid bad pynneh ïa ki jingdon-jingem mariang.
Shuh shuh la bynrap ba ki EAP kiba pynleit jingmut ha ka liang ka mariang ki kynthup ïa ka Meghalaya Livelihood and Access to Markets Project (Megha-LAMP), Meghalaya Community Led Landscape Management Project (MCLLMP), Meghalaya Ecotourism Infrastructure Development Project (MEIDP), Protection of Vulnerable Catchment Areas in Meghalaya bad kiwei-kiwei.
Nalor kine, ka Sorkar ka la pyntreikam ruh ïa katto-katne ki sienjam ba ïadei bad ka jingkylla suiñ bneng ban khmih ïa ki jingtynjuh jong ka jingkylla suiñ bneng ba kynthup ïa ka State Governing Change Governing Council, Payment for Ecosystem Services (PES), State Water Policy, Carbon Finance Projects , Public Awareness Campaign bad kiwei-kiwei.
