Shillong, Naiwieng 03
U Bah Brightstarwell Marbaniang MLA ka Mawlai Konstitwensi ha ka 03 tarik u Naiwieng, 2026, u la leit ban ïakynduh ïa u Commissioner and Secretary ka tnad pule puthi ka Sorkar Jylla, u Dr.Vijay Kumar halor ka jingpynslem ban siew ïa ka DCRG lane ka Death Cum Retirement Gratuity.
Haba kren sha ki lad pathai khubor, u Bah Brightstarwell u la ong ba kane ka dei kaba la ktah shibun eh ïa ki nonghikai kiba la shongthait ha ki kolej deficit bad ha ki skul deficit ruh.
U la ong ba la 6 snem ki nonghikai ki khlem ïoh ïa ka bhah kaba dei hok ka jong ki bad ong ruh ba na ka liang jong u naduh u snem 2023, u la rah ïa kane hapoh ka Ïingdorbar Thawaiñ bad ha kato ka por na ka liang u Myntri Rangbah u la kular ban pynbeit ïa kane.
“Ha ka jingpeit jong nga, ki don ki kolej ba ki nonghikai mar sien shongthait tang hapoh katto-katne bnai, ki la ïoh ïa ka hok ka jong ki bad don kiwei pat haduh mynta kim pat ïoh ïa kaba dei hok ban ïoh,” la ong u Bah Brightstarwell.
Haba ïadei bad kane u la ïathuh ba na ka liang u Commissioner & Secretary u la kular ba hapoh u bnai Naiwieng, un pyrshang ban pynbeit noh ïa kane, khnang ba ki nonghikai kiba dei hok ban ïoh ïa ka DCRG ki dei ban ïoh.
U MLA u la rah ruh ban ïakren haba ïadei bad ka jingdon ka shithi kaba la pynmih da ka tnad pule puthi, ban pynduh noh ïa ka UGC Pay Scale.
“Ka VPP ka sngewkhia bad ngi la wan kynduh ïa u Commissioner & Secretary bunsien ban rah ïa kane ka mat. Ha ka dorbar kaba dang shu dep hapoh ka Ïingdorbar Thawaiñ, nga la rah ïa kane ka mat bad u Myntri Rangbah ka Jylla, u Conrad K. Sangma u la pynthikna, ba un nym pynduh ïa kane ka UGC pay Scale, hynrei tang hadien katto-katne sngi la mih ki shithi kiba pynkulmar jingmut bad kiba long da khongpong ïa kaei kaba u Myntri Rangbah u la kren ha dorbar. U Myntri Rangbah ka Jylla u shu thok,” ong u Bah Brightstarwell.
