Shillong, Naiwieng 03
Ki shiphew tylli ki sengbhalang kiba kynthup ïa ka FKJGP, HNYF, RBYF, GSU, JSU, bad kiwei de ki la ai por hapoh laiphew sngi ïa u Conrad K. Sangma ban pynshai halor ka ILP bad MRSSA kaba kane ka jingdawa ka la kynjoh mynta sha ka shiphew snem kynthih.
Haba ïakren bad u Bah Dundee Khongsit uba dei u President ka FKJGP u la ïathuh ba ka jingïakynduh mynta ka sngi na ka liang ki shiphew tylli ki sengbhalang ïa u Myntri Rangbah ka Jylla u Conrad K. Sangma ka long ban pan jingshai halor ka jingsahteng ka ILP bad MRSSA kaba ki sah umdum namar bym don ba pynshai.
U la ong ha kane ka sngi la ïakren ruh ban pynbeit noh ïa u pud u sam bad ka Assam bad ka jingduh ki jaka sha Bangladesh.
Shuh shuh u la ïathuh ba ka seng ka kwah jingshai namar balei ka Sorkar kam shym la pyntreikam ïa ka aiñ MRSSA kaba la mynjur ha u snem 2016 hynrei ka Sorkar ka la wanrah biang ka jingpynkylla namar ki dang don ki aiñ kiba dang duna.
“Ngi la ong balei ka Sorkar kam pyntreikam ïa ka MRSSA 2016, ynda la pyntreikam lada kam long hangta ngin sa wanrah ïa ka jingpynkylla, hynrei u Conrad u la pan por ban ïakynduh biang ïa ngi ki sengbhalang ban ïatai sani bha” u la ong.
U la pyntip ba ka kynhun ka la ïakren ruh ïa ka jingïakajia ha khappud namar kim kwah ban ïohi ïa ka jingjia ba sngewsih kumta ki kwah ba ka Sorkar kan pynbeit noh ïa u pud u sam bad ka Sorkar Assam.
Shuh shuh u la pynpaw ba ka Sorkar ka ju kyndit thiah tad ynda ki sengbhalang ki la mih sha surok hynrei mynta ki kwah ban wan ïakynduh markhmat ban ïakren namar kine ki aiñ ki dei ban treikam hapoh ka Jylla ban ïada ïa ki jaidbynriew rit paid.
