Shillong, Naiwieng 03
U Symbud Myntri Rangbah ka Jylla Bah Prestone Tynsong ha ka sngi Ba-ar u la ong, ka NPP ka khlem beh ïa ka UDP shabar jong ka Sorkar MDA-II.
Kane ka jingpynpaw jong u Bah Prestone kala long tang hadien katto katne kynta ba ka UDP ha ka jingïalang jong ka CEC kaba la long ha ka sngi Ba-ar kala shim ïa ka rai ban weng noh ïa ka jingkyrshan ïa ka Sorkar MDA hadien ba u President Bah Metbah Lyngdoh u la hiar noh na ka shuki Myntri hadien ba u la sah marwei kum u MLA ka UDP.
“Hooid, ngi ïatreilang, hynrei kam dei ba ngi beh noh ïa ki. Lada ki mih, ngin ong aiu shuh ma ngi,” ong u Bah Prestone.
Halor ka jingktah na kane ka jingweng jingkyrshan, u la ong, “Nga dang shu tip ïa kane mynta hi. Kumno kan ktah ïa ngi?. Ïa mynta ngi don haduh 36 ngut”.
Shuh shuh u Bah Prestone u la bynrap ba ka NPP ka kwah ban bteng ïa ka jingïatreilang bad ka UDP hadien habud.
“Hynrei ngi la ong ba ka jingkular ban bteng ïa ka jingïatreilang kan don beit, ka lah ban nym long tang ïa ka mynta, ka lah ban dei hadien ka 2028, dei kane kaba ngi kwah,” u la ong.
