Shillong, Naiwieng 03
Ka United Democratic Party (UDP) ha ka Sngi Ba-ar haba kren shaphang ka projek ‘Shillong Ropeway’, ka la ong ba ki jaka Sorkar hapoh Ri-lum Khasi kim dei kiba don shabar jong u pud u sam ka Khasi Hills Autonomous District Council (KHADC).
U General Secretary ka UDP, u Bah Titosstarwell Chyne u la ong ba ka seng ka la dep ban aiti ha ka Shillong City ban shong pyrkhat halor kane ka bynta bad na ka liang jong ka (Shillong City) kan sa shim ïa ki sienjam haba ïadei bad kane.
“Ka seng ka la aiti ïa kane sha ka Shillong City, bad shen bha, na ka liang ka Shillong City, kan sa shim ïa ka sienjam kumno ban kren halor kane ka mat,” la ong u Bah Titos.
Halor ka jingleit khang jong ka KHADC ïa ka jaka ba pyntrei ïa ka ‘Shillong Ropeway’, u Bah Titos u la ong ba ka aiñ ka kren shai ba ka ‘trading license’ ka long kaba donkam ïa kino-kino ki bym dei Khasi ban ïaid shakhmat bad ki kam khaïi hapoh ka Jylla.
“Ha ka jingshisha, ki kyndon ne ka aiñ ka kren shai ba uno-uno u briew u bym dei u trai-ri trai-muluk ne u trai jaka, kaba mut u bym dei u Khasi, haba u wan ban leh ïa ka kam khaïi ha ka jaka jong ngi, la ka long kum u ‘riew shimet ne ka kompeni, kaba kongsan tam, u dei ban ïoh shuwa ïa ka ‘Trading Licence’. Kata ka long kaba shai,” u la ong.
Ha kawei ka liang u la kyntait ban kren eiei halor ka jingpynslem jong ka Council ban shim kam ïa katei ka mat, da kaba ong ba ka shong ha ka Executive Committee ba la ïalam da ka VPP ban pynshai halor kane.
Halor ka jingleit khang tala ïa ka ophis, u Bah Titos u la ong ba um pat ïoh jingshai la katei ka jaka ba la khang tala ka dei ka jingdon-jingem jong ka Sorkar ne jong ka kompeni.
“Lada ka dei ka jingdon-jingem Sorkar, kata ngim don hok ban khang. Hynrei lada ka dei ka jingdon-jingem jong ka kompeni, ka shong biang ha ka EC, ha kano ka rukom kin pynshong nongrim lyngba ka aiñ ban leit khang ïa katei ka ophis,” u la ong.
Na ka liang u Bah Titos u la pynshai ruh ïa ka kyrdan jong ka Khyrnit ba 6.
“Hapoh u pud u sam jong ka Khyrnit ba 6, ki don ruh ki jaka Sorkar, bad ha kine ki jaka Sorkar, kam mut ba ka jingpeit jong ka District Council kam treikam,” u la ong.
“Lait noh tang ha kine ki ‘European Ward’ kiba ka Khyrnit ba 6 kam kynthup, ka Khyrnit ba 6 hi ka hap hapoh ka District Council,” u la bynrap.
